Ўзбекистондаги шаҳарга Бобур номининг берилиши Покистонда олқишланди

Президент Шавкат Мирзиёев Марказий ва Жанубий Осиё бўйлаб миллионлаб одамларнинг қалбида чуқур акс садо берган қадамни ташлади. У Андижон вилоятидаги янги шаҳарга Бобурийлар салтанатининг буюк асосчиси, ҳам ўзбеклар, ҳам покистонликлар учун суюкли тарихий шахс Заҳириддин Муҳаммад Бобур номи берилишини маълум қилди. Бу ҳақда Покистоннинг Islamabad Post нашри ёзди.

Президент Шавкат Мирзиёев буюк мутафаккир, шоир ва давлат арбоби Заҳириддин Муҳаммад Бобурнинг беқиёс меросига алоҳида урғу берди. Президент Бобурнинг илм-фан, адабиёт ва маданиятга қўшган улкан хизматларини эъзозлаш, унинг хотирасини абадийлаштириш мақсадида янги шаҳарга «Бобур шаҳри» деб ном беришни таклиф қилди.

«Бобур Мирзо темурийлар Уйғониш даврининг муносиб давомчиси, илм-фан, маданият, санъат ва адабиёт ҳомийси эди. Унинг беқиёс мероси бутун дунёга халқимиз шон-шуҳратини келтирди. Унинг номи билан аталган шаҳарнинг бунёд этилиши унинг бир умрлик орзусининг рамзий тимсоли», деди президент Мирзиёев.

Бобур мероси кўп асрлик тарих, архитектура ва маданият орқали Покистонда яшаб келмоқда. Покистон учун бу бирдамлик ва умумий мероснинг муҳим белгисидир.

Бобур туғилган Андижон вилояти Ўзбекистоннинг энг зич жойлашган ҳудудларидан биридир. Ҳукумат 2021 йилда шаҳарсозликни кенгайтириш ва замонавий турмуш даражасини таъминлаш учун истиқболли янги шаҳар лойиҳасини ишга туширди. Ушбу дадил лойиҳа саккиз босқичда аввал фойдаланилмаган 4 минг гектар майдонда барпо этилмоқда.