Самарқандда экспортни қўллаб-қувватлаш учун ажратилган маблағни ўзлаштирган мансабдорлар аниқланди

Коррупцияга қарши курашиш агентлиги маълум қилишича, агентлик Самарқанд вилоятидаги тадбиркорлик субъектларининг экспорт фаолиятини қўллаб-қувватлаш учун “Савдони ривожлантириш компанияси” АЖ (собиқ Экспортни рағбатлантириш агентлиги) томонидан ажратилган молиявий ёрдам маблағларининг мақсадли ишлатилиши ҳолатини ўрганди.

Маълум бўлишича,  АЖ томонидан 5 та, жумладан, “А.Ф” хусусий корхонаси, “Қ.Ж”, “О.Г”, “А.Ш” фермер хўжаликлари ва “С.М.М” МЧЖга консалтинг хизмати учун 9 та сертификат олишга 709 млн сўм субсидия ажратилган.

Агентлик томонидан ўтказилган ўрганишда сертификат олишга консалтинг хизмати кўрсатувчи “W.М”, “Д.Қ.С” МЧЖ, шунингдек, “О.М.С” ХК юқорида қайд этилган фермер хўжаликлари ва МЧЖга аслида кўрсатилмаган консалтинг хизматлари учун сохта ҳужжатлар тайёрлаб, “Савдони ривожлантириш компанияси”га тақдим этган ва жами 600 млн сўм бюджет маблағларини ўз ҳисоб рақамларига ўтказишга эришгани аниқланди.  

Қайд этилган ҳолатлар бўйича ушбу консалтинг хизмати кўрсатувчилар, “Савдони ривожлантириш компанияси” АЖнинг мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилди.

Айни пайтда дастлабки тергов ҳаракатлари олиб борилмоқда.