Ўзбекистон | 11:25 / 03.07.2025
965
1 дақиқада ўқилади

Таянч ихтисослаштирилган мактаблар кириш имтиҳони 10-12 июлда бўлиб ўтади

Жорий йилнинг 10–12 июл кунлари Муҳаммад ал-Хоразмий, Мирзо Улуғбек ҳамда Абу Али ибн Сино номидаги ихтисослаштирилган мактаблари учун кириш имтиҳонлари ўтказилади.

Фото: Xabar.uz

Кириш имтиҳонлари талабгорларнинг ўз ҳудудларида – Қорақалпоғистон Республикаси, вилоятлар ва Тошкент шаҳрида бўлиб ўтади.

Яъни, ҳудудлардан мазкур мактабларга ҳужжат топширган ўқувчиларнинг имтиҳонда қатнашиши учун Тошкент шаҳрига келиши талаб этилмайди.

Тошкент шаҳридаги Муҳаммад ал-Хоразмий номидаги ихтисослаштирилган мактаби ҳамда мазкур мактабнинг Нукус, Андижон, Бухоро, Фарғона, Гулистон, Жиззах, Самарқанд, Урганч шаҳарларидаги филиаллари учун кириш имтиҳони бир вақтда бўлиб ўтади.

Талабгорларга топшириқларни бажариш учун 105 дақиқа вақт берилади.

Талабгорларга топшириқларни бажариш учун белгиланган вақтдан (105 дақиқа) ташқари, кириш имтиҳонининг жавоблар варағини белгилаш учун қўшимча вақт берилмайди.

Имтиҳон рухсатномасини юклаб олиш учун талабгорнинг аризада киритилган телефон рақамларига смс-хабарнома юборилади.

Шундан сўнг, имтиҳон ўтказиладиган жой номи ва вақти тўғрисидаги маълумотлар қайд этилган рухсатномани шахсий кабинет орқали юклаб олиш мумкин.

Мавзуга оид