АҚШ Конгресси Вакиллар палатаси республикачилар овози билан мудофаа вазири Пит Ҳегсетга нисбатан импичмент эълон қилиш тўғрисидаги резолюцияни Ҳуқуқий масалалар қўмитасига юборди. Бу қарор амалда ташаббусни Конгресснинг янги таркиби январь ойида иш бошлагунга қадар тўхтатиб қўяди.
10 ноябр, сешанба куни кечқурун АҚШ Конгресси Вакиллар палатаси республикачиларнинг мудофаа вазири Пит Ҳегсетга қарши импичмент резолюциясини палатанинг Ҳуқуқий масалалар қўмитасига юбориш тўғрисидаги таклифини маъқуллади.
Таклифни 211 нафар конгрессмен қўллаб-қувватлади, 204 нафари эса унга қарши овоз берди.
Мазкур қўмита республикачилар назоратида бўлгани сабабли, Ҳегсетни лавозимидан четлатиш ташаббуси Конгресснинг кейинги таркиби иш бошлагунга қадар амалда тўхтатилди. Бу ҳақда Reuters агентлиги хабар берди.
Конгресснинг янги таркиби 2027 йил 3 январдан иш бошлайди.
Ноябр ойида ўтказилган оралиқ сайловлар натижасига кўра, Демократик партия вакиллари Конгресснинг ҳар икки палатасида — Вакиллар палатаси ва Сенатда кўпчилик ўринларни эгаллайди.
Янги таркиб ўз ваколатларини бажаришга киришгач, демократлар мудофаа вазирини лавозимидан четлатиш учун яна бир бор ҳаракат қилиши мумкин.
Бунинг учун Вакиллар палатасида оддий кўпчилик овози, Сенатда эса депутатларнинг учдан икки қисми қўллаб-қувватлаши талаб этилади.
Шу пайтга қадар АҚШ тарихида бирор марта ҳам мудофаа вазирига нисбатан импичмент эълон қилинмаган.
Ҳегсетга қарши импичмент резолюцияси лойиҳасини унинг партиядоши — Кентукки штатидан сайланган республикачилар вакили Томас Мэсси тақдим этган.
Конгрессмен мудофаа вазирини ўз ваколатларини суиистеъмол қилишда айблаган. Хусусан, у Конгресс рухсатисиз бошланган Эрондаги урушни бунга мисол қилиб келтирган.
Ҳегсет эса ўзига қўйилган айбловларни рад этиб, уларни «масхарабозлик» деб атаган.
«Тарих Эрондаги урушга бугунги кунда жамоатчилик фикрида устунлик қилаётган қарашлардан мутлақо бошқача баҳо беради», — деди вазир Пентагонда ўтказилган матбуот анжуманида.
АҚШ президенти Доналд Трамп ҳам Ҳегсетни қўллаб-қувватлади.
