АҚШ 8 августгача Украинада тинчлик ўрнатишга чақирди

Россия ва Украина 8 августгача тинчлик келишувига эришиши керак, деди АҚШнинг БМТдаги доимий вакили ўринбосари Жон Келли Москва томонидан чақирилган БМТ Хавфсизлик кенгаши йиғилишида.

Фото: Selcuk Acar/Anadolu/IMAGO

АҚШ расмийлари Россия ва Украина 8 августгача тинчлик битими тузишини истамоқда. Бу ҳақда 31 июл, пайшанба куни АҚШнинг БМТдаги доимий вакили ўринбосари Жон Келли Москва ташаббуси билан чақирилган Украина бўйича БМТ Хавфсизлик кенгаши йиғилишида маълум қилди.

«Россия ва Украина ўт очишни тўхтатиш ва доимий тинчлик бўйича келишиб олиши керак. Келишувни тузиш вақти келди. Президент Трамп буни 8 августгача амалга ошириш кераклигини аниқ айтди. Қўшма Штатлар тинчликни таъминлаш учун қўшимча чора-тадбирлар кўришга тайёр», — деди Келли. Унинг қисқача жавоби БМТ сайтида чоп этилган.

Россия Федерациясининг БМТдаги доимий вакили ўринбосари Дмитрий Полянский айтишича, Москва йиғилишни Хавфсизлик кенгаши эътиборини Ғарбнинг «Украина инқирозини дипломатик йўл билан ҳал қилиш истиқболларига бевосита ёки билвосита путур етказувчи» ҳаракатларига қаратиш мақсадида чақиртирган. Дипломатнинг сўзлари БМТ сайтида ҳам келтирилди.

«Украина инқирози Ғарбнинг Россия хавфсизлик манфаатларига эътибор бермасликка бўлган кўп йиллик саъй-ҳаракатлари натижасида юзага келган кенг қамровли инқирознинг ҳосиласидир», деди Полянский. У Москванинг Украина масаласини дипломатик йўл билан ҳал қилишга тайёрлигини маълум қилди ва Ғарб давлатларини «тўсиб туриш ўрнига ҳамкорлик қилишга» чақирди.