Немисларнинг 59 фоизи қўлида қурол билан Германияни ҳимоя қилишга тайёр эмас

Ўтказилган сўров шуни кўрсатдики, Германия фуқароларининг ярмидан кўпи (59 фоизи) агар мамлакат ҳужумга учраса, қўлида қурол билан уни ҳимоя қилмайди. Аксарият - мажбурий ҳарбий хизматни ўташ тарафдори, ёшлар эса бунга қарши.

Фото: Michael Bihlmayer/CHROMORANGE/picture alliance

Германия фуқароларининг ярмидан кўпи (59 фоизи), агар мамлакат ҳужумга учраса, қўлида қурол билан уни ҳимоя қилмайди. Бу Forsa социология институти томонидан 4 август, душанба куни Redaktionsnetzwerk Deutschland (RND) медиа гуруҳи томонидан эълон қилинган сўров натижалари.

Социологлар 28-29 июл кунлари 1002 киши — эркаклар ва аёллар ўртасида сўров ўтказди. «Ҳужум содир бўлса, Германияни қўлингизда қурол билан ҳимоя қиласизми?» деган саволга фақат 16 фоиз «албатта ҳа» деб жавоб берди. 22 фоиз «эҳтимол», 59 фоиз «эҳтимол йўқ» ёки «умуман йўқ» дея жавоб қайтарди.

Эркаклар орасида респондентларнинг 46 фоизи мамлакатни ҳимоя қилишга тайёр эмас, аёллар орасида эса 72 фоиз. Ёш гуруҳларида мудофаага тайёр бўлмаганларнинг энг кўпи (68 фоиз) 60 ёшдан ошганлардир. Партия тарафдорларидан — Сўл партия сайловчилари орасида (71 фоиз).

«Бундесверда кўнгиллилар етарли бўлмаса, мажбурий ҳарбий хизмат зарурми?» деган саволга респондентларнинг 59 фоизи ижобий, 37 фоизи салбий жавоб берди. Муддатли ҳарбий хизматга чақиришга қарши бўлганларнинг энг кўп қисми ёшлар (61 фоиз) бўлиб, бу уларнинг ўзига нисбатан қўлланиши мумкин. Муддатли ҳарбий хизматни қўллаб-қувватловчиларнинг энг кўп қисми (67 фоиз) 60 ёшдан ошган ва энди чақирилмайдиган шахслардир.