Apple компанияси iPhone 17 смартфонлари ишлаб чиқаришни тўлиқ Ҳиндистонга кўчирди

Ишлаб чиқаришни кўчириш геосиёсий кескинлик ва АҚШ тариф сиёсати билан боғлиқ хатарларни камайтиришга интилиш билан боғлиқ.

Фото: Bloomberg

Apple Америка бозорининг Хитойга қарамлигини камайтириш мақсадида Ҳиндистонда iPhone ишлаб чиқаришни кенгайтирмоқда.

IPhone 17 тўртта модели ҳам Ҳиндистонда ишлаб чиқарилади, деб хабар берди Bloomberg инсайдери Марк Гурман.

Маълум қилинишича, ишлаб чиқаришни кенгайтириш бешта заводни, жумладан Tata Group ва Foxconn янги объектларини ўз ичига олади. Tata корхоналари яқин икки йил ичида Ҳиндистондаги барча iPhone смартфонларининг ярмини ишлаб чиқариши кутилмоқда.

Апрель-июль ойларида Ҳиндистондан 7,5 миллиард долларлик iPhone жўнатилди, бу ўтган молиявий йилга нисбатан икки баравар кўп. Ҳиндистон Хитойни ортда қолдириб, АҚШ учун смартфонлар ишлаб чиқариш бўйича етакчига айланди. Canalys таҳлилий платформаси маълумотлари шундан далолат беради.

Ишлаб чиқаришни кўчириш геосиёсий кескинлик ва АҚШ тариф сиёсати билан боғлиқ хатарларни камайтиришга интилиш билан боғлиқ. Бироқ, Хитой технологияларни беришга тўсқинлик қилмоқда ва Foxconn хитойлик муҳандислар ўрнига Тайван ва Япониядан мутахассисларни таклиф қилди, бу эса харажатларни оширди.

Тайёрлаган: Сардор Юсупов

#Ҳиндистон #Хитой #Apple