Бу сафар ҳазиллар ва ўзаро ҳурмат: ўзбек тилида тўлиқ версия
|21:35 / 21.08.202525 81122 мин
АҚШ президенти 15 август куни Путин билан Аляскада кўришгач, орадан 2 кун ўтиб, Зеленский Вашингтонга борди. Украина президентига Европанинг 7 номдор сиёсатчилари ҳамроҳлик қилди. Бу февраль ойидаги тортишувли учрашувдан кейин АҚШ ва Украина президентларининг Оқ уйда биринчи марта кўришиши эди. Мен 6 та уруш кўрганман, Украина урушини тугатиш – энг осони бўлади деб ўйлагандим, лекин бундай бўлиб чиқмади, дейди Трамп матбуотга юзланаркан.
Kun.uz Зеленский ва Трамп учрашувини тўлиқ ўзбек тилида тақдим этади.
Доналд Трамп: Хўш, катта раҳмат. Украина президенти биз билан бўлиши – шараф. Биз кўплаб яхши музокаралар ўтказдик ва менимча, олдинга силжиш бор. Кўп жиҳатдан жуда, жуда сезиларли ўсиш. Россия президенти билан яқинда ўтказилган учрашув ва сиз билан бугунги учрашувимиз жуда муҳим. Бизда Европадан келган етти нафар жуда нуфузли меҳмон ҳам бор ва ушбу учрашувдан сўнг дарҳол биз улар билан учрашмоқчимиз. Келганингиз учун сизга катта раҳмат.
Володимир Зеленский: Катта раҳмат, жаноб президент. Рухсат берсангиз, биринчи навбатда, таклифингиз учун ташаккур билдираман ва қотилликларни тўхтатиш ҳамда бу урушни тўхтатиш йўлидаги саъй-ҳаракатларингиз учун катта раҳмат айтмоқчиман. Раҳмат. Фурсатдан фойдаланиб, рафиқангиз, Америка Қўшма Штатларининг биринчи хонимига катта раҳмат айтаман. У бизнинг фарзандларимиз, ўғирланган болалар ҳақида Путинга мактуб юборди. Менинг рафиқам, Украинанинг биринчи хоними эса унга хат жўнатди. Бу сизга эмас, рафиқангизга. <...> Ҳамкорларимизга ва ушбу форматни қўллаб-қувватлаганингиз учун сизга миннатдорчилик билдирамиз, учрашувимиздан сўнг атрофимизда Буюк Британия, Франция, Германия, Италия, Финляндия ва ҳатто Осиёдан ҳам етакчилар билан ўтиришимиз мумкин. Айтмоқчиманки, Украина атрофидаги барча ҳамкорлар бизни қўллаб-қувватламоқда. Уларга раҳмат, таклиф учун сизга ҳам катта раҳмат.
Доналд Трамп: Шу ердалигингиз учун сизга ҳам катта раҳмат.
(Мухбирларнинг саволлари бошланади)
Мухбир: Раҳмат, президент Трамп. Демак, президент Зеленский, сиз бугун X ижтимоий тармоғидаги постда шундай деяпсиз: «Россия ўзи бошлаган бу урушга чек қўйиши керак». Президент Трамп, сиз эса «агар Украина президенти Зеленский истаса, Россия билан урушга деярли дарҳол чек қўйиши мумкин» деяпсиз. Аслида эса ундай эмас.
Мавзуга оид
Доналд Трамп: Менимча, бу гапим тўғри. Фил, биз учрашамиз деб ўйлайман. Агар бугун ҳаммаси яхши кечса, уч томонлама учрашув бўлади. Ва ўйлайманки, ўшанда урушни тугатиш учун ҳақиқий имконият юзага келади.
Мухбир: Американинг Украинани қўллаб-қувватлаши шу билан тугайдими? Бугунги учрашув бўладими ёки йўқми?
Доналд Трамп: Мен буни ҳеч қачон айта олмайман. Бу ҳеч қачон йўлнинг охири эмас. Одамлар ўлдирилмоқда ва биз буни тўхтатмоқчимиз. Шунинг учун мен буни йўлнинг охири деб айтмаган бўлардим. Йўқ, менимча, бизда буни амалга ошириш учун яхши имконият бор. Кўплаб одамлар ўлдирилиши бошланганига деярли тўрт йил бўлди. Ўтган ҳафтада ҳам кўплаб одамлар ўлдирилди. Айтмоқчиманки, миллионлаб одамлар ҳалок бўлмоқда, қандайдир сабабларга кўра, ҳар икки томондан кўп сонли аскарлар ўлмоқда. Ва мен президентни биламан, мен ўзимни биламан ва ишонаманки, Владимир Путин ҳам бу тугашини хоҳлайди.
Мухбир: Сиз жума куни Путин билан учрашдингиз. Бугун президент Зеленский келди. Ҳозир қайси томонда карталар яхшироқ?
Доналд Трамп: Мен бундай демоқчи эмасман. Мен шунчаки тинчликка эришмоқчиман. Менга қаранг, бу менинг урушим эмас. Бу Жо Байденнинг уруши. У бу воқеага кўп жиҳатдан алоқадор бўлган ва биз бу тугашини хоҳлаймиз. Ва ҳаммаси барча учун яхшилик билан тугашини истаймиз. Украина халқи қаттиқ жабр кўрди.
Украина стратегияси ва йўқотишлар ҳақидаги саволлар
Мухбир: Президент Зеленский, сиз яна бир неча йил давомида украин аскарларини ўлимга юборишга тайёрмисиз ёки хариталар қайтадан чизилишига рози бўласизми?
Володимир Зеленский: Саволингиз учун раҳмат. Демак, аввало айтишим керакки, биз ҳар куни ҳужум остида яшаяпмиз. Хабарингиз бор, бугун ҳам жуда кўп ҳужумлар бўлди ва кўпчилик яраланди. Шунинг учун, Россияни тўхтатиш учун биз бу урушни якунлашимиз керак ва бизга америкалик ҳамда европалик ҳамкорлар кўмаги зарур. Ва биз бунинг учун қўлимиздан келганини қиламиз. Ўйлайманки, биз кучли одамлар эканимизни кўрсатяпмиз ва биз Қўшма Штатлар, шахсан президент Трампнинг бу урушни тўхтатиш ғоясини қўллаб-қувватладик, бу урушни тугатишнинг дипломатик йўлига эга бўлмоқчимиз ва биз президент айтганидек, уч томонлама ҳаракатларга тайёрмиз. Бу жуда яхши сигнал. Раҳмат.
Тинчликпарвар кучлар ва хавфсизлик кафолатлари муҳокамаси
Мухбир: Жаноб президент, агар тинчлик келишувига эришилса, сиз Америка тинчликпарварларини Украинага юборишга тайёрмисиз?
Доналд Трамп: Нима десам экан, биз Украина билан ишлаймиз. Биз ҳамма билан ишлаймиз ва шундай қиламизки, агар тинчлик бўлса, у узоқ вақт сақланиб қолади. Бу жуда узоқ муддатли бўлади. Гап икки йиллик тинчлик ҳақида кетаётгани йўқ, акс ҳолда биз яна шундай вазиятга тушиб қоламиз. Биз ҳаммаси яхши бўлиши тўғрисида қайғурамиз. Россия билан ҳам ишлаймиз. Украина билан ишлаймиз ва ҳаммаси яхши бўлиши учун ҳаракат қиламиз. Ва, ўйлайманки, агар тинчликка эриша олсак, у амалга ошади. Бунга ҳеч қандай шубҳам йўқ.
Мухбир: Жаноб президент, сиз ҳозир хавфсизлик кафолатлари ҳақида гапирдингиз. Америка қўшини ҳам ишга солинадими?
Доналд Трамп: Эҳтимол, бугун бу ҳақда сизга хабар берармиз. Биз, шунингдек, буюк давлатларнинг етти буюк етакчилари билан учрашамиз ва бу ҳақда гаплашамиз. Уларнинг барчаси жалб этилади. Лекин ёрдам кўп бўлади. Хавфсизлик масаласига келсак, ёрдам кўп бўлади. Улар мудофаанинг биринчи чизиғи, чунки улар ўша ерда. Бу Европа. Лекин биз ҳам уларга ёрдам берамиз. Биз иштирок этамиз.
Урашнинг ва олдинги можароларнинг асл сабаблари
Мухбир: Сиз бу урушнинг келиб чиқиш сабабларини бартараф этмасдан, уруш тугамаслигини айтяпсиз. Бу уруш келиб чиқиши сабаблари ҳақида тасаввурга эгамисиз?
Доналд Трамп: Хўш, қаранг, уруш тугаш арафасида. Қачон тугашини сизга айтолмайман. Аммо уруш тугаш арафасида ва бу жаноб уруш тугашини истайди, Владимир Путин ҳам уруш тугашини истайди. Менимча, бутун дунё бундан чарчаган ва биз уни тугатмоқчимиз. Биласизми, мен олтита урушга жалб этилганман. Мен олтита урушни ҳал қилганман ва бунисини тугатиш энг осони бўлса керак, деб ўйлардим. Лекин бу энг осони бўлиб чиқмади. Бу жуда қийин. Бунинг сабаблари кўп ва улар бу ҳақда узоқ гапириши мумкин. Қаранг, Ҳиндистон, Покистон, биз катта жойлар ҳақида гапиряпмиз. Кўрганингизда, бу урушларнинг баъзиларига шунчаки қарайсиз. Африкага борасиз, Руанда ва Конгони, Конго Республикасига қарайсиз. Мана 31 йилдирки, шундай давом этмоқда. Шундай қилиб, биз жами олтита урушни тўхтатдик, Эроннинг ядровий салоҳиятини йўқ қилганимизни ҳисобга олмаганда. Буниси ҳам ҳал бўлади, деб ўйлайман. Буни ҳал қилишимизга ишончим комил.
Мухбир: Раҳмат, жаноб президент. Бизга Европа етакчилари билан суҳбатларингиз ҳақида айтиб беролмайсизми?
Доналд Трамп: Хўш, биз жуда қудратли, жуда катта мамлакатлар ва буюк инсонлар, менинг дўстларим бўлган катта вакиллар оиласи билан учрашмоқчимиз. Ва биз баъзи таклифларни киритмоқчимиз. Улар тинчликни кўришни истайди.
Ҳудудий ён беришлар ва Биринчи хонимнинг мактуби ҳақида савол
Мухбир: Президент Трамп, агар Украина ҳали Россия томонидан босиб олинмаган ҳудудларидан воз кечадиган бўлса, мустаҳкам тинчликка эришилади. Ва бу Украина учун адолатли тинчлик бўладими?
Доналд Трамп: Бизда мустаҳкам тинчлик бўлади. Шунчаки саволингизнинг биринчи қисмига жавоб бериш учун айтаман, бизда мустаҳкам тинчлик бўлади. Умид қиламанки, бу дарҳол рўй беради. Бу давом этмаслиги керак. Ва ўйлайманки, бутун дунёдаги одамлар бу эълон қилинганида жуда хурсанд бўлишади.
Мухбир: Сиз, жаноб президент, ижтимоий тармоқларда Биринчи хонимнинг жуда таъсирли мактубини жойлаштирдингиз. Ва хат президент Путинга топширилди. Ва у моҳиятан болалар ва уларнинг келажаги учун урушни тўхтатишга чақиради. Нима учун биринчи хоним бу хатни зарур деб топди? У жаноб Путинни урушда тажовузкор деб ҳисоблагани учунми? Худди шундай хат президент Зеленскийга ҳам топшириладими?
Доналд Трамп: Биринчи леди жуда кучли. Мен ва сиз кўраётган воқеаларни у ҳам кўради. Мен сиз кўра олмайдиган нарсаларни кўраман ва бу даҳшатли. У болаларни жуда яхши кўради, унинг ажойиб ўғли бор, у ўғлини ҳаммадан, жумладан, мендан ҳам кўпроқ севади. Мен буни айтгим келмайди, аммо у ўғлини жуда яхши кўради. У болаларни севади. Ва у бўлаётган ишларга тоқат қила олмайди. Бу барча урушларга тааллуқли. Мен сиз ҳам телевизор орқали кўраётган вайрон бўлган қалблар, фарзандидан айрилган ота-оналар, дафн маросимларини назарда тутяпман. Ҳар куни дафн маросимлари. Биз буни кўришни хоҳламаймиз. Унинг мактуби яхши қабул қилинди. У уруш тугашини қаттиқ хоҳлайди. Ва у буни жуда очиқ, мағрурлик ва чуқур қайғу билан айтади, чунки жуда кўп одамлар ҳалок бўлмоқда.
Сайлов ҳақида
Мухбир: Ҳар иккингизга саволим бор. Биринчи навбатда жаноб Зеленскийга. Сиз бу костюмда ажойиб кўриняпсиз.
Доналд Трамп: Мен ҳам худди шундай дедим. Кўринишингиз яхши. Мен ҳам шундай дедим. Бу ўтган сафар сизга ҳужум қилган одам.
Володимир Зеленский: Сиз эса ҳамон ўша костюмда экансиз. Мен ўзгардим. Сиз ўзгармабсиз.
Мухбир: Агар тез орада тинчликка эришилса, юртингизда сайлов ўтказишга тайёрмисиз?
Володимир Зеленский: Ҳа, албатта. Биз сайловлар учун очиқмиз, ҳа. Аммо биз хавфсизлик чораларига риоя этишимиз керак. Биз парламентда иш олиб боришимиз лозим, чунки уруш пайтида сайлов ўтказиш мумкин эмас. Лекин биз хавфсизликни таъминлай оламиз. Бизга ҳамма жойда — жанг майдонида, ҳавода, денгизда сулҳ керак, токи одамлар демократик, очиқ, қонуний сайловларга келиш имкониятига эга бўлсин.
Доналд Трамп: Демак, сиз айтяпсизки, уруш вақтида сайлов ўтказа олмаяпсиз. Айтмоқчисизки, агар биз ҳам 3,5 йил давомида ким биландир уруш ҳолатида бўлсак, қайтиб сайлов ўтказмас эканмиз-да? О, қандай яхши.
Володимир Зеленский: Бу ғоя сизга ёқди-я?
Трамп тинчлик учун ҳаракатлари ОАВда ёритилмаётганидан нолиди
Мухбир: Бу ҳақда сўраш мен учун ҳам бемаънилик бўлиб туюлади, лекин сиз Америка медиаси ҳақиқатан ҳам тинчлик келишувини хоҳламайди деб ўйлайсизми? Чунки сиз тинчлик учун курашаётганингизда, улар ҳар қадамда сизга танқидий баҳо бераётгандек кўринади.
Доналд Трамп: Бу ажойиб ҳодиса. Агар мен келишувга Москвани, Санкт-Петербургни ва унинг атрофидаги минг мил ҳудудни қўшдим десам ҳам улар мени ёмон битим тузди, деган бўларди. Нафрат ва душманлик даражаси ақл бовар қилмайдиган даражада. Ҳамма билан ҳам эмас. Айтмоқчиманки, у ерда, юқорида ажойиб одамлар бор. Яна ўйлайманки, у ерда нима ёзишни айтиб турадиган даҳшатли одамлар ҳам бор. Аммо, биласизми, улар бу урушларнинг барчасини ҳал қилишда ҳақида ёзишмайди.
Биласиз, мен катта урушларнинг гувоҳи бўлганман. Мен 31, 35 ва 37 йил давом этган урушларни, шунингдек, анча қисқароқ давом этган урушларни кўрганман. Бу музокаралар тез орада кенг кўламли келишувга айланиши керак. Аммо улар бу ҳақда ёзишмайди. Балки бу маълум даражада сизнинг фойдангизга хизмат қилар. Аммо мен нима иш қилмайин, қандай келишув тузмайин, менимча, сизга яхши бўлади. Балки президент Путин ҳам яхши натижа билан чиқар. Аммо улар Трамп мутлақо ёмон ишлади дейишади.
Мен бунга анчадан бери кўникиб кетганман. Биринчи сайловимдан бери шундай. Илгари мен катта шуҳрат қозонгандим. Энди эса ўз лавозимимда ишлаган ҳар қандай одам учун энг даҳшатли машҳурликка эгаман. Одамлар охир-оқибат фақат ўзлари ҳисоб-китоб қилишларини тушунишини истардим. Жуда яхши журналистларим ҳам бор эди. Лекин тўғри иш қилганингда бундай бўлиши жуда қайғули.
Мисол учун, улар Владимир Путиннинг Америка заминига келиши Доналд Трамп учун катта мағлубият бўлганини айтишди. Йўқ, унинг келиши ҳақиқатан ҳам ажойиб эди. Тўғрисини айтганда, буни қилиш унга қийин бўлди. Бу улар айтган гапнинг тамоман тескариси эди. Лекин улар шундай дейишди. У келмаса ҳам буни Трамп учун ёмон дейишади. Бу президентга нисбатан инсофсизлик. Менимча, шунинг учун ҳам у ишончни йўқотган. Унинг ишончи жуда паст даражада.
Сулҳ ва тинчлик музокаралари муҳокамаси
Мухбир: Ўтган ҳафтада сиз агар Россия 30 кунлик ўт очишни тўхтатишга рози бўлмайдиган бўлса, жиддий оқибатлар бўлишидан огоҳлантиргандингиз. Жиддий оқибатлар бўладими? Учрашув туфайли нимадир ўзгардими?
Доналд Трамп: Бу йил мен тузган олтита битимга қарасангиз, ҳаммаси урушда тузилган. Мен ҳеч қандай оташкесим тузмадим ва ўт очишни тўхтатиш яхши бўлиши мумкинлигини биламан, лекин мен стратегик жиҳатдан нима учун у ёки бу давлат буни хоҳламаслигини ҳам тушуна оламан. Ўртада сулҳ бор, улар эса куч тўплаяпти, тўплаяпти ва тўплаяпти, эҳтимол, улар шунинг учун буни хоҳлашмаётгандир. Аммо биз узоқ муддатли, давомли урушларда тузган олтита битимга қарайдиган бўлсак, мен ҳеч қандай оташкесимсиз ҳам ҳал қилдим.
Мен оташкесимни хоҳлайманми? Ҳа. Мен ўт очишни тўхтатиш концепциясини бир сабабга кўра ёқтираман: бу ҳолда одамлар ўлдиришни бир-икки ҳафта ёки қанча керак бўлса, шунчага эмас, дарҳол тўхтатади. Аммо биз улар уришаётган пайтда тинчлик келишувига эришишимиз мумкин. Улар уруш қилишига тўғри келяпти. Истардимки, улар тўхтасин. Мен улар тўхташини хоҳлардим, аммо стратегик жиҳатдан бу иккала томон учун ҳам фойдали бўлмаслиги мумкин. Аммо мен келишувларнинг ҳаммасини оташкесим тўғрисида оғиз очмасдан ҳам амалга оширдим.
Мухбир: Украинага НАТО аъзолигисиз хавфсизлик кафолатлари таклиф этилмоқда. Айнан қандай кафолатлари ҳақида гап кетаётганига аниқлик кирита оласизми?
Доналд Трамп: Биз ҳали бу борада ҳеч нарса қилмадик. Агар ортга назар ташласак ва президент Путиндан анча олдин содир бўлган воқеаларга қарасак, Украина ҳеч қачон НАТОга қабул қилинмаслиги ҳақида баёнот доимо бўлган. Шундай қилиб, шундай баёнот берилди, лекин биз ҳали ҳеч нарсани муҳокама қилмадик. Биз бугун буни муҳокама қилмоқчимиз. Лекин уларга жуда яхши ҳимоя, жуда яхши хавфсизликни таъминлаймиз. Бу режамизнинг бир қисмидир. Бизни кутаётган иттифоқчиларимиз биз билан ҳамфикр. Улар ҳам ёрдам беришни хоҳлашади.
АҚШнинг молиявий ёрдами
Мухбир: Қўшма Штатлар Украинадаги ҳарбий ҳаракатлар учун аллақачон юзлаб миллиард доллар ажратди. Энг яхши ҳолатда бу боши берк кўча ва қотиллик эса давом этмоқда. Хўш, президент Трамп, Қўшма Штатлар Украинага яна қанча беришга тайёр? Президент Зеленский, сиз-чи, яна қанча хоҳлайсиз?
Доналд Трамп: Хўш, мен шунчаки ҳеч нарса бермаслигимиздан бошлайман. Ҳозир қурол сотяпмиз. Бу илгари, ўйлайманки, 300 миллиард доллардан ортиқ рақамлар эди, Жо Байден даврида, у ақлли одам эмас, коррупциялашган сиёсатчи эди, бунақаси ҳеч қачон бўлмаган. Дарвоқе, у 40 йил олдин ҳам ақлли одам бўлмаган. Лекин ҳозир айниқса ёмон. Бу коррупциялашган маъмурият томонидан амалга оширилган, бундай бўлмаслиги керак эди. Ва, тўғрисини айтганда, агар сайлов натижалари тўғри бўлганида, агар мен президент бўлганимда, бу уруш ҳеч қачон бўлмасди. У эса жуда бахтиёр одам бўларди, бу нарсаларни кўрмасди.
Демоқчиманки, улар жаҳаннамни бошдан кечиришган. У дўзахдан ўтди. Бу уруш ҳеч қачон бўлмаган бўларди. Икки миллион одам, кўплаб аскарлар ўлими ва бошқалар бўлмасди. Ва содир бўлган воқеалар туфайли бошқа ҳудудлар ва бошқа мамлакатларга кўчишга мажбур бўлган одамлар, буларнинг ҳеч бири содир бўлмас эди. Ва мен шунчаки айтмоқчиманки, чегаралар қандай бўлишидан қатъи назар, у даҳшатли президент эди. У шунчаки даҳшатли, порахўр президент эди.
Зеленский қурол хариди ва мудофаа салоҳияти ҳақида
Володимир Зеленский: Катта раҳмат. Аввало, бизда Қўшма Штатлардан қурол сотиб олиш имконияти пайдо бўлди. Биз бу дастур ва бу имкониятдан миннатдормиз. Биз Европадан миннатдормиз. Бунинг учун улар пул тўлашади. НАТО дастурлари орқали. Ўзимизда ҳам молиялаштириш баъзи дастурлар мавжуд. Ва бу урушни молиялаштириш эмас. Бу хавфсизлик кафолатлари, армиямизни мустаҳкамлаш, Украина армиясини қайта қуроллантиришнинг ҳам бир қисми бўлади. Бу жуда ва жуда муҳим.
Ва бу қайта жиҳозлаш учун бизга қанча пул кераклигига боғлиқ. Масалан, ҳаво ҳужумидан мудофаа масаласи, биз бу ҳақда президент Трамп билан гаплашдик. Ва мен ҳозир бизда икки томонлама ечимлар борлигидан хурсандман ва биз бу борада Америка ишлаб чиқарувчилари билан ишлаймиз. Мисол учун, Европада ҳеч ким Patriot каби катта ҳаво мудофаа тизимларига эга эмас. Бизга эса бу жуда керак. Бу ҳам ҳимоя.
Доналд Трамп: Ва менимча, биласизми, менимча, яхши янгилик шундаки, биз дунёдаги энг яхши ҳарбий техникани ишлаб чиқарамиз. Сиз Patriot тизимларини тилга олдингиз. Улар қанчалик яхши? Ҳа бизда шундай тизимлар бор. Улар чиндан ҳам юз фоизга ишончли. Бу ҳақиқатан ҳам иккита ўқ отишга ўхшайди, биласизми? Иккита ўқ ҳавода бир-бирига тегади, бундай шароитда имкониятлар юз фоиз. Бу 99 фоиздан 100 фоизгача.
Шундай қилиб, биз НАТО жиҳозларини сотамиз. Мен НАТО нима қилаётгани, сизларда қандай келишув борлигини билмайман. Лекин биламанки, улар сизларда қуроллар бўлишини хоҳлашади. Ва биз дунёдаги энг яхши қуролларни ишлаб чиқарамиз. Улар эса бизга пул тўлашади. Байден даврида ҳаммаси шунчаки аҳмоқлик эди. Менимча, бу рақам 300 миллиарддан ортиқ. Бу 350 миллиард долларлик қуроллар ва бошқа нарсалар бўлиши мумкин. Сўнгги икки ой ичида биз бу урушни ҳал қилишда тўрт йилдагидан кўра кўпроқ ютуқларга эришдик. Бу аллақачон ҳал бўлиши керак эди, лекин ҳеч қачон бошланмаслиги керак эди.
Хавфсизлик кафолатлари муҳокамаси
Мухбир: Хавфсизлик кафолатлари доирасида президент Трампдан сизга айнан нималар керак: Америка аскарлари, разведка маълумотлари ёки техникалар?
Володимир Зеленский: Барчаси. Барчаси. Аслида у икки қисмни ўз ичига олади. Биринчидан, кучли Украина армияси. Мен ҳамксабларингиз билан мана шуни муҳокама қила бошладим. Ва бу қуроллар ва одамлар, ўқув миссиялари ва разведка ҳақида кўп нарса. Иккинчидан, биз буни ҳамкорларимиз билан муҳокама қиламиз. Бу катта давлатларга, АҚШга, кўплаб дўстларимизга боғлиқ.
Доналд Трамп: Ҳозир бошқа хонада одамлар кутиб турибди. Уларнинг ҳаммаси Европадан, Европадаги энг катта одамлар. Ва улар ҳимоя қилишни хоҳлашади. Улар буни жуда яхши ҳис қилишади. Ва биз уларга бу борада ёрдам берамиз. Менимча, бу жуда муҳим. Битим тузиш жуда муҳим деб ўйлайман.
Украина халқига тилак
Мухбир: Жаноб президент, сиз маъмуриятдаги фаолиятингизнинг биринчи кунидан бошлаб Украинадаги тинчликпарварлик ишларида иштирок этдингиз. Ҳозирда Россия ҳужумларидан азият чекаётган ва Америка халқи улар билан бирга бўлишига умид қилаётган Украина халқига нима деган бўлардингиз?
Доналд Трамп: Мен украинларни биламан. Мен бу йиллар давомида кўпчилик ҳақида билиб олдим. Улар ажойиб инсонлар. Улар ақлли. Улар ғайратли. Улар ўз юртларини севадилар. Айтмоқчиманки, улар ўз мамлакатларини севишади. Мен бу уруш тугашини истайман. Қўлимдан келадигани шу. Мен украин халқини яхши кўраман, лекин ҳамма одамларни яхши кўраман. Мен рус халқини ҳам яхши кўраман. Уруш тўхташини истайман. Бу жуда муҳим.
Мухбир: Жаноб президент, Владимир Путин билан музокараларингизнинг бирор жиҳати ҳафсалангизни пир қилдими?
Доналд Трамп: Биз шу бугуноқ, бу учрашувлардан сўнг телефон орқали суҳбатлашамиз. Бизда уч томонлама учрашув бўлиши ҳам, бўлмаслиги ҳам мумкин. Агар бизда уч томонлама бўлмаса, ҳарбий ҳаракатлар давом этаверади. Агар уч томонлама учрашувга келишсак, бизда урушни якунлаш учун яхши имконият бўлади. У менинг қўнғироғимни кутиб ўтирибди. Катта раҳмат.
