Трампнинг Украинада тинчлик ўрнатишга уринишлари тўрт кун ичида боши берк кўчага кириб қолди – ОАВ

АҚШ президенти Доналд Трамп 18 август куни Украинадаги урушда тезда тинчлик келишувига эришгани билан мақтанди, бироқ орадан тўрт кун ўтгач, Киевнинг Россияга янги ҳужумларсиз урушда ғалаба қозониш имконияти йўқлигини айтди, деб ёзди The Wall Street Journal ва бундай бурилиш Трампнинг урушни тўхтатиш бўйича сўнгги саъй-ҳаракатларига нисбатан сўнаётган оптимизм эканини таъкидлади.

Трампнинг Россия етакчиси Владимир Путин ва Украина президенти Володимир Зеленский билан тинчлик битими тузиш бўйича саммитга умидлари амалга ошмади. Унинг захира режаси ҳам ўзини оқламади, унга кўра Путин ва Зеленский уруш тугашини муҳокама қилиш учун шахсан учрашиши керак эди. Бундан ташқари, тинчлик келишувига эришилган тақдирда Ғарб тинчликпарвар кучларини Украинага юбориш ғояси Кремль томонидан рад этилди.

WSJ нашрининг таъкидлашича, дипломатик ютуққа эриша олмаслик қисман Путин ва Трамп ўртасидаги музокаралар услубидаги кескин фарқлар билан изоҳланади.

«АҚШ президенти, собиқ ёрдамчиларининг сўзларига кўра, кўп жиҳатдан шахсий муносабатларга асосланган импровизацияга амал қилади. Путин ўз тайёргарлигида тартибли ва ҳиссиётлардан холи. Трамп можарони тезроқ тугатишга интилмоқда... Путин ҳар икки томондан минглаб қурбонлар бўлса ҳам, дипломатлар музокаралар олиб бораётган бир пайтда Россия жанг майдонидаги позицияларини аста-секин яхшилай олишига умид қилиб, узоқроқ ўйин ўйнамоқда», деб таъкидлади нашр.

Таҳлилчиларга кўра, президентнинг ижтимоий тармоқларда Украина томонидан Россияга ҳужум қилиш тавсия этилган хабари босим ричагларини қайтариб олишга уриниш бўлиши мумкин, чунки дипломатия ҳеч қандай натижа бермаётганга ўхшайди.

«Бу шуни англатадики, у Россияга босим ўтказиш ўз стратегиясининг энг қўпол камчилиги эканлигини тушунади», деди АҚШнинг Россиядаги ва НАТО ташкилотидаги собиқ элчиси Александр Вершбоу.

Трампнинг биринчи муддатида Миллий хавфсизлик кенгашида Россия бўйича етакчи эксперт лавозимини эгаллаган Фиона Ҳиллнинг айтишича, унинг Путин, Зеленский ва Европа етакчилари билан Оқ уйда бўлиб ўтган сўнгги учрашувлари чалкаш жараёнга олиб келган ва, эҳтимол, АҚШ ва Россия раҳбарлари хавфсизлик кафолатларини турлича тушунади.

Гарчи Трамп маъмурияти тез орада келишувга эришишга умид қилишига қатъий ишонса-да, баъзи собиқ амалдорлар кенг қамровли келишув бўлиши даргумонлигини таъкидлади.

«Биз икки ҳафта олдин бўлган жойда, ярим йил олдин бўлган жойда турибмиз», деди Трампнинг биринчи муддати давомида АҚШнинг Украина бўйича музокаралар бўйича махсус вакили бўлиб ишлаган Курт Волкер. «Ҳеч қачон келишув бўлмайди. Путин ҳеч қачон рози бўлмайди».

Аввалроқ, Трамп яқин икки ҳафта ичида дунё Украинадаги уруш тугаш-тугамаслигини билишига ишонаётганини айтган эди.