Тошкент осмонидаги кичик самолёт Шарқий аэропорт навигация тизимини созламоқда

Dala Air компаниясининг Diamond DA42 самолёти Тошкент Шарқий аэропорти учиш-қўниш йўлаги навигация тизимини созлаш билан шуғулланмоқда. Flightradar 24 маълумотларига кўра, самолёт 17 августдан буён ҳар куни бир неча соатлик парвозни амалга оширган.

Фото: Kun.uz

Сўнгги бир неча кун давомида Тошкент осмонида пастлаб учаётган кичик русумдаги самолёт кўзга ташланмоқда. Kun.uz мухбирининг аниқлик киритишича, ушбу самолёт Қозоғистоннинг Dala Air компаниясига тегишли Diamond DA42 Twin Star самолёт-лабораторияси ҳисобланади.

У Тошкентнинг янги — Шарқий аэропорти учиш-қўниш йўлаги навигация тизимини созлаш билан шуғулланмоқда. Хусусан, Flightradar 24 маълумотларига кўра, самолёт камида 17 августдан буён ҳар куни осмонда 3-4 соатлик текширув ишларини олиб борган.

«Tashkent SkyNews»нинг маълум қилишича, 15 август куни Тошкент-Шарқий аэропортининг янги йўлагига ушбу турдаги самолётнинг биринчи қўнишини амалга оширган.