Ижро иши бўйича кафолат маблағлари институти жорий этилади

«Суд ҳужжатлари ва бошқа органлар ҳужжатларини ижро этиш тўғрисида»ги қонунга янги механизм киритилмоқда – ижро иши бўйича кафолат маблағлари.

Мақсад – ижро ҳужжатлари устидан шикоят қилишда қарздорлар ва ундирувчиларнинг манфаатларини мувозанатлаш.

Қонун Ўзбекистонда ижро иши бўйича кафолат маблағлари институтини жорий этувчи нормалар билан тўлдирилди (қонуннинг 11-, 33-1-, 34- ва 38-моддалари).

Агар қарздорга нисбатан ижро иши бошланган бўлса (суд қарори бўйича мол-мулкни ундириш), у шикоят қилиш даврида ижрони тўхтатиб туриш имкониятига эга. Бунинг учун қарздор мажбурий ижро органининг махсус депозит ҳисобварағига пул маблағларини – ижро иши бўйича кафолат маблағлари деб аталувчи маблағларни киритиши мумкин.

Кафолат маблағларини ижро ҳужжати бўйича мажбуриятларнинг тўлиқ ҳажмида ёки бажарилмаган қисми миқдорида киритиш керак.