Европа давлатлари Вашингтондан Москвага қарши санкцияларни кучайтиришни истаса, Россия нефт ва газини сотиб олишни тўхтатиши керак. Бу ҳақда 8 сентябр, душанба куни чоп этилган Financial Times газетасига берган интервюсида АҚШ энергетика вазири Крис Райт айтди.
«Агар европаликлар чизиқ чизиб: «биз Россия газини сотиб олмаймиз, Россия нефтини олмаймиз» деса, бу АҚШнинг янада тажовузкор бўлишига (санкция киритишда) ижобий таъсир қиладими? Албатта», — дейди Райт.
У Россия энергия ресурсларини Америка суюлтирилган табиий гази, бензини ва бошқа маҳсулотлари билан алмаштиришни таклиф қилди. Унинг сўзларига кўра, бу ЕИга АҚШ билан савдо келишуви шартларини бажаришга имкон беради, унга кўра, Европа давлатлари 2028 йил охиригача АҚШнинг 750 миллиард долларлик энергия ресурсларини сотиб олиши керак.
