Камбағалликни қисқартиришга оид форумда қиймати 495 млн долларлик келишув ва меморандумлар имзоланди – ИМВ

Форум доирасида имзоланган келишувлар қаторида А-380 “Ғузор-Бухоро-Нукус-Бейнеу” автомобил йўлининг 581-673 км қисмини реконструкция қилиш, “Бир қишлоқ — бир маҳсулот” лойиҳасини бошлаш, мактабларда сув, санитария-гигиена ҳолатини яхшилаш ва Ўзбекистонда “ESKO” бозорини ривожлантириш кабилар бор.

2025 йилнинг 17-18 сентябр кунлари Наманган шаҳрида бўлиб ўтган “Камбағалликдан фаровонлик сари” Ўзбекистон камбағалликни қисқартириш III халқаро форуми ўз ишини якунлади.

Иқтисодиёт ва молия вазирлиги хабарига кўра, форум доирасида қиймати 495 млн долларлик 10 дан ортиқ келишув ва меморандумлар имзоланди.

Форум доирасида 12 та панел сессиялар ташкил этилди. Уларда Ўзбекистонда камбағалликни қисқартириш борасида йиғилган тажрибалар юзасидан фикр алмашилди ҳамда аҳоли фаровонлигини янада ошириш, инклюзив иқтисодий ўсишни таъминлаш, барқарор ривожланиш мақсадларига эришишга қаратилган истиқболдаги режалар ва янги ташаббусларга эътибор қаратилди.

“Ўзбекистон тажрибаси шуни кўрсатадики, камбағаллик тақдир эмас, уни дадил раҳбарлик, интизомли ижро ва инновацион ҳамкорлик билан енгиш мумкин. Ислом тараққиёт банки номидан Ўзбекистон ва барча аъзо давлатларимиз билан бирга бу йўлдан боришга содиқлигимизни яна бир бор тасдиқлайман”, - дея таъкидлади Ислом тараққиёт банки гуруҳи раиси Муҳаммад Ал-Жассер

Қандай келишувларга эришилди?

Форум доирасида Иқтисодиёт ва молия вазирлиги ҳамда халқаро ҳамкорлар томонидан қуйидаги муҳим битимлар тасдиқланди:

• “А-380 “Ғузор-Бухоро-Нукус-Бейнеу” автомобил йўлининг 581-673 км (92 км) қисмини реконструкция қилиш” лойиҳаси бўйича битим;
• Ўзбекистонда “Бир қишлоқ — бир маҳсулот” лойиҳасининг дастлабки босқичини бошлаш юзасидан баённома;
• Сурхондарё вилоятида аҳолини ижтимоий қўллаб-қувватлаш ва иқтисодий фаолиятини ривожлантириш лойиҳаси бўйича грант баённомаси;
• “Uzbekistan Vision - 2030” Ишонч жамғармаси маблағлари ҳисобидан таълим соҳасида “Мактабларда сув, санитария-гигиена ҳолатини яхшилаш ҳамда иқлим ўзгаришига чидамлиликни ошириш” лойиҳаси;
• Ўзбекистон мактаблари ва шифохоналарининг энергия самарадорлигини ошириш лойиҳаси юзасидан ҳамкорлик баённомаси;
• Корхоналарнинг энергия самарадорлигини молиялаштириш лойиҳаси юзасидан ҳамкорлик баённомаси;
• Демографик барқарорлик, гендер тенглиги, хотин-қизлар имкониятларини кенгайтириш юзасидан англашув меморандуми;
• Маҳаллий ривожланишни мустаҳкамлаш ва бандлик ташаббусларини қўллаб-қувватлаш юзасидан англашув меморандуми;
• Микро, кичик ва ўрта тадбиркорликни қўллаб-қувватлаш ва ривожлантириш юзасидан ҳамкорлик битими;
• Ўзбекистонда “ESKO” бозорини ривожлантириш лойиҳаси бўйича ҳамкорлик алоқаларини ривожлантириш юзасидан англашув меморандуми.

Форумда нималар муҳокама қилинди?

Форумда бозор талабларига мос кўникмаларнинг камбағалликни қисқартиришдаги ўрни сессияси ташкил этилди. Унда “харажат-даромадлар” таҳлилидан келиб чиқиб, замонавий касбларнинг анъанавий касбларга нисбатан 2-3 баробарга кўпроқ даромад келтириши ҳамда нисбатан кам инвестиция талаб этилишини инобатга олиб, камбағал оила аъзоларини мазкур касбларга ўқитиш камбағалликни қисқартириш суръатини тезлаштириши мумкинлиги айтиб ўтилди.

«Камбағалликни қисқартиришда ислом молиясининг янги имкониятлари» сессиясида закот, вақф ва фоизсиз молиялаштириш каби ислом молияси воситалари орқали мамлакатда молиявий инклюзивликни ошириш, иқтисодий ўсишни рағбатлантириш масалалари муҳокама қилинди. Хусусан, тадбиркорлик билан шуғулланишни истаган камбағал оилаларнинг ўз бизнесларини бошлаши учун қўшимча молиявий имкониятлар яратиши ҳақида фикр алмашилди.

Ўтиш даврида ижтимоий ҳимоя тизими – инклюзивликни ошириш бўйича глобал тажрибалар сессиясида эса “Инсон” ижтимоий хизматлар марказларида 110 турдаги ёрдам ва хизматлар кўрсатиш йўлга қўйилгани, 2021–2025-йилларда қарийб 48 триллион сўм миқдорида ёрдам кўрсатилиши режалаштирилгани маълум қилинди.

Инсон капиталига сармоя – демографик дивиденд имкониятларидан камбағалликка қарши курашда фойдаланиш сессиясида Ўзбекистонда демографик ўртача йиллик ўсиш 2 фоизни ташкил этгани ҳамда мамлакат аҳолисининг 54,3 фоизи ёшлардан иборатлиги айтилди.

Бундан ташқари, форумда мамлакатнинг 140 та туман ва шаҳарларининг иқтисодий салоҳиятидан келиб чиқиб, 227 та урбанизация, туризм, йўл бўйи инфратузилмасини ривожлантириш ҳамда ҳудудларни комплекс иқтисодий ривожлантиришга қаратилган мастер-режалар ишлаб чиқилаётгани маълум қилинди.