«Иккиламчи санкцияга тушиш масаласига жуда жиддий қараймиз» — Тимур Ишметов

Марказий банк раиси Тимур Ишметов Ўзбекистон томони иккиламчи санкциялар хавфини жиддий таҳлил қилаётганини таъкидлаб ўтди. «Банкларга санкциядаги товарлар ва ташкилотлар билан ишламаслик бўйича қатъий позициямизни айтганмиз ва биз буни назорат қилиб борамиз», деди у.

Фото: Kun.uz

Марказий банкда бўлиб ўтган матбуот анжуманида регулятор раиси АҚШ Молия вазирлиги томонидан Россиянинг «Лукойл» ва «Роснефт» компанияларига қарши киритилган санкцияларнинг Ўзбекистонга эҳтимолий таъсири ҳақида тўхталиб ўтди.

«Ҳар қандай санкция қўллангандан кейин одатда бошқа учинчи давлатларга таъсир қилмайдиган шароит яратиш бўйича музокаралар ўтказилади. Аминманки, бу ҳам худди шундай амалга оширилади ва юқори таъсири бўлмаслиги керак. Банкларимиз амалиётларида айнан шу санкциядаги товарлар, ташкилотлар ҳамда банклар билан ишламаслик бўйича қатъий позициямизни айтяпмиз, айтиб келганмиз. Банкларнинг иккиламчи санкцияларга тушиш масаласига жуда жиддий қаралади... Шундай қатъий позиция биронта банкнинг санкцияларга тушмаслигига олиб келди. Бу йўналишда қатъийликни давом эттирамиз», деди Ишметов.

Аввалроқ, Европа Иттифоқининг Россияга қарши 19-пакет санкциялари доирасида Тожикистон, Қирғизистон ва Қозоғистондаги бир нечта банклар «қора рўйхат»га киритилганди.

Тайёрлаган: Достон Аҳроров

#санкция #Марказий банк #Тимур Ишметов