Ўзбекистон ва Rhenus контейнер йўлакларини ривожлантириш режасини келишиб олди

Брюсселда Ўзбекистон транспорт вазири Илҳом Маҳкамов Rhenus Group компаниясининг бош ижрочи директори ва бошқарув кенгаши раиси Тобиас Бартц билан учрашиб, мамлакатда контейнер ташишларини ривожлантириш ва алоқадор инфратузилма лойиҳаларини жадаллаштириш юзасидан келишувга эришди.

Фото: rhenus.group

Учрашувда транспорт-логистика соҳасидаги ҳамкорликни кенгайтириш бўйича амалий қадамлар кўриб чиқилди. Хусусан, Ўзбекистонда ташкил этилган UzContargo Andijon қўшма корхонаси иштирокида Андижонда замонавий логистика марказини барпо этиш лойиҳасини тезлаштириш, шунингдек, мамлакат ҳудудида контейнер юк ташувларини ривожлантириш ишларини биргаликда ташкил этиш масалалари муҳокама қилинди.

Томонлар контейнер йўлаклари самарадорлигини ошириш, ташишлар ҳажмини босқичма-босқич кенгайтириш ва хизматлар сифатини яхшилашга қаратилган йўл хариталарини мувофиқлаштириш ниятини билдирди.

Томонлар ҳамкорлик бўйича ишчи алоқаларни фаол давом эттиришга келишиб олди.