ГуМ сиёсатчилари келаси ҳафта Россияга боради — Сочида “БРИКС–Европа” симпозиуми режалаштирилган

Германиянинг ўта ўнг ГуМ партиясидан бир нечта етакчи сиёсатчи келаси ҳафта конференцияда иштирок этиш учун Россияга боради. Улар орасида Бундестаг депутатлари Штеффен Котре ва Райнер Ротфус бор — уларнинг иштирокини ГуМ фракцияси вакили тасдиқлади. Бундан ташқари, делегация таркибига партиянинг Саксония бўлими раҳбари Йорг Урбан ҳам киритилгани ҳақида dpa агентлиги Саксония ландтагидаги ГуМ фракцияси раҳбариятига таяниб хабар берди.

Сафарда қатнашишини изоҳлар экан, Урбан Украинага босқин сабаб Россияга нисбатан жорий этилган халқаро санкцияларни танқид қилди. У бу чоралар Германияга жиддий зарар етказаётганини айтди. Ўз навбатида, илгари россиялик тарғиботчи Владимир Соловёвнинг ток-шоусида қатнашган Котре бу сафарда партиядошлари билан “Германия манфаатларини” ҳимоя қилишини билдирди. Шу билан бирга у арзон энергия ташувчилари етказиб бериш, тинчлик дипломатияси ва БРИКС мамлакатлари вакиллари билан алоқалар ҳақида гапирди.

Агентликка кўра, немис депутатларига Европа парламенти депутати Ҳанс Нойхофф ҳамроҳлик қилади. Аввалроқ Бундестагдан икки депутатнинг Сочига сафари ҳақида ARD жамоат телеканали ва t-online портали хабар қилган эди. Урбан ва Нойхоффнинг ҳам иштирок этиши мумкинлиги t-online томонидан ёзилган.

Саксония ландтагидаги ГуМ фракцияси маълумотига кўра, гап “БРИКС ва Европа мамлакатлари симпозиуми” ҳақида кетмоқда. Бундай тадбир ўтган йили илк бор “Бирдaм Россия” қўллаб-қувватловида ўтказилган. Дастурга кўра, “симпозиум” иштирокчилари орасида Россиянинг собиқ президенти, ҳозирда РФ Хавфсизлик кенгаши раиси ўринбосари Дмитрий Медведев ҳам бор. Сафар иштирокчиларининг айримлари у билан учрашишни режалаштирмоқда, деб ёзади t-online. Хусусан, Райнер Ротфус Медведев билан учрашувда қатнашишини айтди ва ўтган йилги шунга ўхшаш учрашувни “фойдали”, “ҳам кенг қамровли, ҳам чуқур тасаввур берган” деб баҳолади.

Германия ўнг популистларининг россиялик расмийлар билан алоқалари, айниқса РФнинг Украинага қарши кенг кўламли уруши бошланганидан буён бир неча бор танқид қилинган. 5 ноябр куни Бундестагда ГуМнинг Россия билан алоқалари юзасидан тортишув бўлиб ўтди — унда ҳукумат коалицияси аъзолари ва мухолифатдаги “Яшиллар” партияси вакиллари ўта ўнгларни Кремл гаровидаги “восита” деб атади.

ОАВ маълумотича, немис ўнг популистларининг Сочига сафарлари 13–16/17 ноябр кунлари бўлиб ўтади. Сафар харажатлари мос равишда 4050 ва 2000 еврога тенг бўлиб, эҳтимол, уларни Бундестагдаги ГуМ фракцияси қоплайди. Фракция раҳбарининг ўринбосари Штефан Койтернинг сўзларига кўра, сафар мақсади — “Россия билан алоқаларни кучайтириш”.

Илгари ҳар икки Бундестаг депутати Россияга келган: Котре 2018 йил президент сайловларида кузатувчи бўлган, Ротфус 2024 йил Сочида Дмитрий Медведев билан учрашган. Ўша сафар партия ичида, жумладан ГуМ раҳбари Алис Вайдел томонидан танқид қилинган. Октябр бошида эса Ҳамбург маҳаллий парламентидаги фракциядан Санкт-Петербургга сафар қилгани учун депутат Роберт Риш чиқариб юборилган.

2025 йил май ойида “Германия учун муқобил” Германияда ҳуқуқий экстремистик деб топилган, аммо бир неча кун ўтиб ГуМ берган даъво сабаб суд қарори ижроси мурожаат кўриб чиқилгунча тўхтатиб қўйилган.