Оҳангаронда эркак дўконга қурол билан бостириб кириб, сотувчига таҳдид қилди

Қамчиқ довонида эркак милтиқ кўтарган ҳолда савдо дўконига бостириб кирди. Ҳолат 22 октябр куни тунда содир бўлган. Унинг бу қилмиши савдо дўконидаги камерага тушиб қолган.

Kun.uz’га келиб тушган видеолавҳада эркак қўлида милтиқ билан дўконга кириб, бақир-чақир қилгани ва қурол билан шу ердаги бошқа бир эркакни ургани кўринади. Сўнгра у “сенга келаман деганмидим”, дея милтиқ билан сотувчи аёлнинг бош қисмига зарба берган. Кейин у растадан ошиб ўтиб, аёлга тан жароҳати етказган.

Kun.uz ушбу шахс Ангрен шаҳрида яшовчи, 1992 йилда туғилган Д.К. эканига аниқлик киритди. У савдо дўконидаги сотувчи аёл – 35 ёшли Ш.Н. билан билан олдиндан таниш бўлган. Эркак ўрталарида келиб чиққан жанжал сабабли ушбу ҳаракатни содир этган.

Kun.uz сотувчи аёл билан суҳбатлашди. Ш.Н.нинг айтишича, улар олдиндан таниш бўлишган.

“Россияга бориб ишлаб келади. Турмуш қуришни таклиф қилди. Аввалига дадам рози бўлгандай бўлди. Аммо унинг ҳаракатларини, қўполлигини кўриб қўрқиб қолдим ва таклифини рад этдим. У Россияда ишлаб юрганида уй оламиз дея менинг картамга 3,5 минг доллар пул ташлаганди. Ўша куни пулни қайтаришимни сўради. Хўп, картадан ечиб олиб, бераман, дедим. Ишда бўлганим учун бунга улгурмагандим. Ярим тунда милтиқ кўтариб дўконимга бостириб келди. Милтиқнинг темир қисми билан бошимга урди. Оғир жароҳат олдим. Шифохонадан кеча чиқдим”, дейди Ш.Н.

Аёлнинг қўшимча қилишича, ҳолат бўйича Оҳангарон тумани ички ишлар бўлими томонидан суриштирув ишлари олиб борилмоқда. Бироқ ҳамон жиноят иши қўзғатилмаган ва Д.К. очиқда юрибди.

“Аксинча, ходимлар ишни “ёпти-ёпти” қилишга уринмоқда. Сабаби, унинг яқин қариндошлари “орган”да ишлайди. Қамоқ эҳтиёт чораси қўллашмади, очиқда юрибди. Бундан қўрқяпмиз. Ҳатто қизимни боғчага олиб боришга ҳам қўрқиб қолдим”, дейди у.

Ҳозирча ҳолат бўйича расмий маълумот берилмади.