Even Realities янги G2 ақлли кўзойнакларини тақдим этди

G2 Glasses ташқи кўриниши бўйича деярли ўтган йилги G1 моделига ўхшайди. Минималистик рамка, енгиллик ва кўзга ташланмайдиган шакл сақлаб қолинган. Қурилманинг асосий функциялари монохром проекция дисплей орқали ишлайди. Шу дисплей ёрдамида фойдаланувчи йўналиш кўрсатмаларини кўз олдида кўриши, тезкор таржималардан фойдаланиши, телепромптер режимида матн ўқиши, қисқа эслатмалар ёзиши ёки сунъий интеллектга мурожаат қилиши мумкин.

Компания тақдимотда G2 Glasses батареяси битта заряд билан икки кундан ортиқ ишлай олишини маълум қилди. Қурилма IP67 ҳимоя стандартига эга бўлиб, сув ва чангдан яхши ҳимояланган. Бу кўзойнакдан ташқарида, саёҳатда ёки кундалик шароитда фойдаланишни янада ишончли қилади.

Ушбу авлоднинг энг муҳим ўзгариши бошқарув тизимига тегишли. Even Realities бу йил кўзойнаклар билан биргаликда R1 Smart Ring номли алоҳида бошқарув ҳалқасини ҳам тақдим этди. Ҳалқа ёрдамида интерфейс бўйича ҳаракатланиш, буйруқларни танлаш ва менюларни бошқариш мумкин. R1 фақат бошқарув воситаси бўлиб қолмай, фойдаланувчининг соғлиғи билан боғлиқ кўрсаткичларни кузатиш, жисмоний фаолликни ўлчаш ва уйқу сифатини таҳлил қилиш функцияларини ҳам таклиф қилади.

G2 Glasses ва R1 Smart Ring биргаликда ягона экотизим сифатида ишлайди. Бу комбинация кўзойнакларни оддий аксессуардан анча юқори даражадаги, қулай бошқарув тизимига эга ақлли қурилмага айлантиради. Фойдаланувчи қўшимча қурилмаларни ишга солмасдан, бевосита кўз олдида керакли маълумотни кўра олади ва уни ҳалқа орқали бошқаради.

Нархлар қуйидагича белгиланган: G2 Display Smart Glasses — 599 доллар, R1 Smart Ring — 249 доллар.

Технологиялар тез ўзгараётган бугунги кунда энг сўнгги янгиликлардан хабардор бўлиш муҳим. Рақамли дунёда адашиб қолмаслик ва шундай янгиликларни биринчилардан билиш учун KUN.UZ Texnologiya Телеграм саҳифасини кузатиб боринг.