Флорентино Перес «Реал» бошқарувини тарк этиши мумкин

У кейинги йили кетиши айтилмоқда.

Фото: AFP

Мадриднинг «Реал» клуби президенти Флорентино Перес ўз лавозимини тарк этиши мумкин. Бу ҳақда журналист Пепе Алварес ижтимоий тармоқдаги саҳифаларида хабар қилган. Инсайдерга кўра, бу 2026 йилда рўй бериши мумкин, ҳолбуки ушбу мулозимнинг ваколатлари 2028 йилгача амал қилиши керак.

Алварес Перес клубнинг бу борадаги позициясидан қатъи назар, ҳокимиятни режали равишда ўтказилишини таъминлаш ҳақида ўйлаётганини айтган. Шу билан бирга, эҳтимолий кетишнинг аниқ сабаблари келтирилмаган.

Бу миш-мишлар фонида эса «Реал» ишончли ўйин намойиш этмоқда. Янги бош мураббий Ҳаби Алонсонинг илк мавсумида жамоа Ла лигада пешқадамлик қилмоқда ҳамда Чемпионлар лигасида ҳам яхши иштирок этмоқда.

Клуб ичкарисида ҳам бу мавсумда тинчлик ҳукмрон. Сезиларли ҳодисалар сифатида Винисиус ўтган ойда «Барселона»га қарши кечган класико вақтида алмаштирилганидан очиқчасига норозилик билдиргани, шунингдек, футболчиларнинг айримларига Алонсонинг ҳаддан ташқари қаттиққўллиги маъқул бўлмаётганини келтириш мумкин.

Яна бир эпизод – «Олтин тўп» топшириш маросимини бойкот қилиш давом этаётгани билан боғлиқ. Бу йил ҳам «Реал» делегацияси Парижга бормади, ҳолбуки клуб футболчиларидан айримлари асосий мукофот учун даъвогарлар қаторида эди. Флорентино Перес 2024 йилги «Олтин тўп» Винисиусга эмас, «Манчестер Сити» яримҳимоячиси Родрига берилганидан қаттиқ норози бўлгани туфайли Мадриддагилар нуфузли тадбирни бойкот қилишни бошлаганди.

Перес истеъфога чиқиши ҳақида тез-тез хабар чиқиб туради. Авваллари клуб бундай хабарларни мунтазам равишда рад этиб келган. Аммо бу сафар ҳозирча «Реал»дан бу борада расмий муносабат бўлмади. Аммо Алвареснинг инсайди ортидан Onda Cero радиоси ўз манбасига таяниб, Перес лавозимидан кетмоқчи эмаслигини маълум қилди.

Флорентино Перес 78 ёшда. У «Реал»ни 22 йил давомида бошқариб келмоқда – у дастлаб 2000-2006 йилларда президент бўлган, 2009 йилда ушбу лавозимга қайтганди. Унинг бошқаруви даврида «Реал» жами 37 соврин ютган, жумладан, етти бор Чемпионлар лигасида ғолиб чиққан.

2025 йил январида Перес «Реал» президентлигига қайта сайланганди. Унинг ваколати муддати 2028 йилгача амал қилади.

Тайёрлаган: Азиз Қаршиев

#Реал #Флорентино Перес