Москва областининг Одинцово районида ўсмир пичоқ билан мактабга кириб келган ва ўқувчиларга ҳужум қилди. Маҳаллий телеграм-каналларга кўра, ҳужум Горки-2 посёлкасида жойлашган Успенский номидаги умумтаълим мактабида рўй берган.
Тергов қўмитаси маълум қилишича, ўқувчилардан бири ҳужум оқибатида ҳалок бўлган. Москва области полициясига кўра, у мактабнинг тўртинчи синфида ўқувчи 10 ёшли бола бўлган.
Ҳужум уюштирган ўсмир қўлга олинган. Телеграм-каналларда ёзилишича, у 15 ёшли Тимофей К. бўлиб, шу мактабнинг 9-синфи ўқувчиси ҳисобланади. «База» нашри ёзишича, у қотилликдан кейин ўз қурбонининг жасади фонида селфи олган.
Телеграм-каналларга кўра, Тимофей No Lives Matter («Ҳеч кимнинг ҳаёти аҳамиятга эга эмас») ёзуви туширилган футболкада бўлган – ирқчилар бу шиорни Black Lives Matter шиорига жавобан ўйлаб топишган. Бундан ташқари, ушбу ўсмирнинг бошида америкалик неонацист, 2015 йилда Чарлстон шаҳридаги черковда тўққиз нафар қора танлини ўлдирган Дилан Руфдан иқтибослар ёзилган шлем бўлган. Шлемдаги ибора шундай кўринишда: «Буни мен қилишимга тўғри келди, чунки кимдир нимадир қилиши керак эди». «Осторожно, новости» қайд этишича, бу иқтибоснинг давоми қуйидагича: «Чунки, биласизки, қора танлилар ҳар куни кўчаларда оқ танлиларни ўлдирмоқда».
Ушбу ўсмир ўз ҳужумини видеога олган. Кадрда у ўқитувчи билан турган ўқувчилар гуруҳи олдига боргани ва улардан қайси миллатдан эканини сўрагани акс этган. Шу пайтда ортдан мактаб қўриқчиси яқинлашиб келган, Тимофей эса унга аввалига қалампирли баллон билан ҳужум қилган, пичоқ билан бир марта зарба берган, кейин эса ўқувчиларга қараб югурган. Улардан бирига етиб олиб, турли жойларига бир неча марта пичоқ санчган. Mash телеграм-канали ёзишича, у бу ҳолат акс этган видеони ўзининг шахсий телеграм-каналига жойлаштирган.
Хабарларга кўра, марҳумнинг исми Қобилжон бўлиб, у тожик миллатига мансуб бўлган.
«Осторожно, новости» томонидан эълон қилинган яна бир видеода, Тимофей синфхоналардан бирига кирган ва «ўзи исмини эслай олмаган, қорамтир» ўқитувчи бугун мактабга келган-келмаганини сўраган. Хонадаги ўқитувчи инкор маъносида жавоб қайтарган ва айнан кимни излаётганини сўраган, кейин эса уни навбатчи ва қўриқчининг олдига олиб боришга уринган. «Мен барибир умрбод қамоқда ўтираман», – дея жавоб қайтарган ўсмир. Ўқитувчининг «нима қилаётгани» ҳақидаги кейинги саволига шундай жавоб берган: «Википедияда ўқийсиз».
