Ўзбекистонга пул ўтказмалари III чоракда 18,5 фоизга ўсди

2025 йилнинг III чорагида меҳнат муҳожирлари томонидан Ўзбекистонга 5,7 млрд доллар миқдорида пул ўтказмалари амалга оширилиб, ўтган йилнинг мос даврига нисбатан 18,5 фоиз ўсиш қайд этилди. Бу Марказий банк томонидан эълон қилинган меҳнат бозори шарҳида келтирилади.

«Жорий динамиканинг шаклланиши асосан меҳнат муҳожирларини қабул қилувчи мамлакатларда валюта курсларининг нисбатан барқарорлиги, иш ҳақининг ошиши ва иқтисодий фаолликнинг юқори суръатлари билан боғлиқ», дейилади релизда.

III чоракда Болтиқ давлатлари ва бошқа минтақалардан (АҚШ, Россия, Европа ва Осиё минтақаларини ҳисобга олмаганда) ўтказмалар ҳажми ўсиш суръати қолган минтақаларга нисбатан юқорироқ бўлган. Хусусан, мазкур минтақалардан пул ўтказмалари 40 фоизга ўсган. Шу билан бирга, Европа, Россия ва Осиё минтақаларидан эса ўтказмалар ўсиш суръатининг секинлашиш тенденцияси давом этган.

Шарҳда келтирилишича, ташқи бозорда, хусусан Россия, Европа ва Болтиқ давлатларида кузатилаётган сўнгги тенденциялар ҳамда ишчи кучига бўлган талабнинг ўсиши пул ўтказмаларидаги жорий динамиканинг шаклланишида муҳим аҳамият касб этган. Бу, ўз навбатида, меҳнат муҳожирлари оқими йўналишлари босқичма-босқич кенгаяётганлигидан далолат беради. Сўнгги йилларда миграция йўналишлари кенгайиши асосан Осиё, Европа ва АҚШ мамлакатларида кузатиляпти. Хусусан, 2025 йил 1 октябр ҳолатига Кореядаги ўзбекистонлик резидентлар сони йил бошига нисбатан 0,4 фоизга ўсиб, 95,3 минг нафарни ташкил этган.