Қўшимча функционаллар
-
Тунги кўриниш
Трамп Венесуэланинг вақтинчалик раҳбарига таҳдид қилди
АҚШ президенти Венесуэланинг вақтинча раҳбари Делси Родригесни АҚШ билан ҳамкорликдан бош тортса, бунинг бадали қиммат бўлиши билан қўрқитди. Венесуэла вице-президенти Мадуро америкалик ҳарбийлар томонидан олиб кетилганидан кейин ҳам уни мамлакатнинг ягона қонуний президенти деб атаган эди.
Венесуэланинг вақтинча президенти Делси Родригес, агар АҚШ билан ҳамкорлик қилишдан бош тортса, “Мадуродан ҳам қимматроқ нарх тўлайди”, — деди Оқ уй раҳбари Доналд Трамп якшанба, 4 январ куни The Atlantic нашрига берган интервюсида. Илгари АҚШ етакчиси агар Родригес “биз истаган ишни қилса”, Венесуэлада АҚШ ҳарбий иштироки керак бўлмаслигини таъкидлаган эди.
Журналистлар билан суҳбатда Доналд Трамп, шунингдек, АҚШга мудофаа мақсадида Гренландия устидан назорат зарурлигини айтди.
3 январ куни Венесуэла Олий суди мамлакат вице-президенти Делси Родригесни давлатнинг вақтинча раҳбари этиб тайинлади. Бундан аввал АҚШ махсус бўлинмалари Каракасда президент Николас Мадуро ва унинг рафиқаси Силия Флоресни қўлга олиб, Венесуэладан Ню-Йоркка олиб чиққан эди. АҚШ ҳукуматининг нияти — Мадурони “наркотерроризм” айблови билан судга тортиш.
Аввалроқ, Николас Мадуро ва унинг турмуш ўртоғи қўлга олинганига бағишланган матбуот анжуманида Доналд Трамп Венесуэлани вақтинча бошқаришни унинг маъмурияти ўз зиммасига олишини маълум қилган. Bloomberg маълумотига кўра, бу жараёнда асосий ролни АҚШ давлат котиби Марко Рубио ўйнайди.
Ўшанда Трамп Делси Родригес АҚШ билан ҳамкорлик қилишга тайёр эканини билдирганини ҳам айтган. Бироқ 3 январ куни Венесуэланинг вақтинча президенти давлат телеканали орқали чиқиш қилиб, Николас Мадурони мамлакатнинг ягона қонуний президенти деб атаган.
Венесуэла Қуролли кучлари Делси Гонсалесни қўллаб-қувватлади. 4 январ куни эълон қилинган венесуэлаликларга видеомурожаатда мудофаа вазири Владимир Падрино армия АҚШ интервенцияси келтириб чиқарган давлат инқирози вақтида “конституцияга мувофиқ” тарзда Гонсалесни қўллаб-қувватлашини айтди.
Падрино сўзларига кўра, мамлакат ҳудудида АҚШнинг “империалистик тажовузи”га қарши туриш учун қуролли кучлар ва полиция бўлинмалари жанговар шайлик ҳолатига келтирилади. Мудофаа вазири Мадурони қўлга олишни “қўрқоқларча ўғирлаб кетиш” деб атади.
Мадуронинг қулаши
