Financial Times (FT) хабарига кўра, Ҳонконг компаниясига тегишли, Сиерра-Леоне байроғи остидаги Leruo танкери Бразилияга йўл олди. Айни пайтда Россиянинг Талисман танкери Атлантика океанидан Ўртаер денгизига ўтиб, ҳозир Жазоир қирғоқлари яқинида турибди. Кема «фармойиш кутмоқда» (for orders) мақомига эга. Нашр маълумотларига кўра, бу юкнинг ҳозирча тасдиқланган харидори ёки манзил порти йўқлигини англатади. Иккала танкер ҳам Ғарб санкциялари остида қолмоқда.
Грециянинг Eastern Mediterranean Maritime компаниясига қарашли яна бир танкер — Agioi Fanendes ҳам худди шундай мақомни кўрсатмоқда. Бироқ у ҳозирча АҚШ томон ҳаракатланишда давом этмоқда. Кема эгасининг маълум қилишича, юк тушириладиган порт ҳали тасдиқланмаган. Kpler таҳлилий компанияси маълумотларига кўра, у ҳам Ню-Йоркка олиб борувчи дастлабки йўналишини ўзгартириши мумкин. Сейшел оролларидаги компанияларга тегишли санкция остидаги яна бир кема — Beast танкери 27 октябр куни Приморск портида ёнилғи юклаган, ҳозирча Американинг Атлантика соҳиллари томон йўналишини сақлаб қолмоқда.
Kpler таҳлилчиси Мэтт Смитнинг тушунтиришича, Америка компаниялари ҳуқуқий хатарлар ва санкциялар туфайли Россия дизелини сотиб олишга «журъат этолмаяпти». Аввалроқ энергетика соҳаси вакиллари ва таҳлилчилар ҳам The Washington Sun газетасига худди шу ҳақда маълум қилган эди. АҚШ шарқий соҳилидаги нефт маҳсулотларини қабул қилиш ва тақсимлаш бўйича энг йирик марказ жойлашган Ню-Жерси штати губернатори Микки Шеррилл эса бизнес вакилларини Трамп ва Путин келишуви 2022 йилда, Украинага бостириб кирилгандан сўнг Россиядан энергия ресурсларини импорт қилишни тақиқлаган қонунга зид экани ҳақида огоҳлантирди. Бундан ташқари, Шеррилл Ню-Йорк ва Ню-Жерси порт бошқармасини, шунингдек, нефт терминаллари операторларини Россия дизелини қабул қилмасликка чақирди.
FT нашрининг эътибор қаратишича, йўналишнинг ўзгариши АҚШда дизел ёнилғиси билан боғлиқ вазият янада оғирлашган бир пайтга тўғри келди: янги маълумотларга кўра, унинг захиралари сўнгги йигирма йилдан ортиқ вақт ичида илк бор 100 миллион баррелдан пастга тушиб кетган.
Трамп Путин билан дизел келишуви ҳақида 9 октябр куни эълон қилган, шундан сўнг АҚШ Молия вазирлиги Россия ёнилғисига қарши чекловларни 2027 йилнинг апрелига қадар тўхтатиб қўйган эди. Маълумки, АҚШга йўналтирилган учта танкер бортида 140 минг тонна дизел ёнилғиси мавжуд.
Конгресс ушбу можароли келишув юзасидан текширув ўтказишга ваъда берди ҳамда банклар ва портларга у билан боғлиқ операцияларга оид барча ҳужжатларни сақлаб қўйиш талаби билан хат йўллади. Вакиллар палатасининг Суд-ҳуқуқ масалалари бўйича қўмитаси аъзоси Жейми Раскин бизнес вакилларини Россия дизелини харид қилиш 1 миллион долларгача жарима ва 20 йилгача қамоқ жазосига сабаб бўлиши мумкинлигидан алоҳида огоҳлантирди.
