Германия ғарбидаги подстанцияга номаълум шахслар ҳужум қилди

Улар Шимолий Рейн – Вестфалия еридаги Эркрат шаҳрида жойлашган электр подстанциясини ёқиб юборишга уринган, аммо у узилишларсиз ишлашда давом этяпти, деб хабар берди прокуратура.

Фото: WDR / Von Johannes Rasch

Номаълум шахслар Германиянинг Шимолий Рейн – Вестфалия федерал ерида жойлашган Эркрат шаҳридаги электр подстанциясида ёнғин чиқариш (қасддан ёқиб юбориш)ни уюштиришга уринди. Бу ҳақда жамоат-ҳуқуқий медиа компанияси WDR 7 январ, чоршанба куни кечқурун ўз сайтида Вуппертал прокуратурасига таяниб хабар берди.

Аниқланишича, терговчилар диққатини эҳтимолий жиноятчилар — Kommando Angry Birds гуруҳи томонидан ёзилган мактуб (мурожаат) жалб қилган, у сўл қанотга мансуб indymedia платформасида эълон қилинган. Ушбу мактуб ўрганиб чиқилгандан сўнг, полиция Эркрат подстанциясида текширув ўтказди. Ёнғин чиқаришга уринишни журналистларга прокуратура вакили — прокурор Волф-Тилман Баумерт ҳам тасдиқлади.

Кўринишича, ҳужумчиларнинг мақсади Эркратдаги Макс-Планк-штрассе кўчасида жойлашган саноат ҳудудини электрсиз қолдириш бўлган. Жиноятчилар мактубида айтилганидек, улар подстанциядаги икки трансформатордан бирини ёқиб юборишга уринган. Бироқ прокуратура маълумотига кўра, ҳужум муваффақиятсиз якунланган: подстанция бутун вақт давомида узилишларсиз ишлаган.

Прокурор Баумертнинг сўзларига кўра, бу қасддан ёнғин чиқариш муҳим инфратузилмага ҳужум ҳисобланади. “Агар у муваффақиятли чиққанида, эҳтимол, катта кўламли электр узилиши содир бўларди”, — деб тушунтирди у WDR билан суҳбатда.

Ҳодиса бўйича терговни сиёсий мотивларда содир этилган жиноятларга қарши курашишга ихтисослашган, Дюсселдорфдаги давлат ҳимояси бўлими — Staatsschutz олиб бормоқда.