Техникумларда дуал таълим олувчи ўқувчиларга стипендия жорий этилиши мумкин

Техникумларда дуал таълим шаклида таҳсил олаётган ўқувчиларни моддий жиҳатдан қўллаб-қувватлаш мақсадида стипендия тўлаш тартибини жорий этиш назарда тутилган Вазирлар Маҳкамаси қарори лойиҳаси тайёрланди.

Фото: Kun.uz

Лойиҳа Ўзбекистон президентининг 2025 йил 23 октябрдаги ПҚ–316-сон қарори ижросини таъминлашга қаратилган.

Ҳужжатга кўра:

🔹 2026/2027 ўқув йилидан бошлаб техникумларда дуал таълим шаклида ўқиётган ўқувчиларга махсус электрон платформа орқали стипендия тўланади;
🔹 ўқувчиларга ҳар ой базавий ҳисоблаш миқдорининг бир баравари миқдорида стипендия тўлаш белгиланмоқда;
🔹 агар иш берувчи томонидан ўқувчининг касбий кўникмалари ва интизоми қониқарсиз деб баҳоланса, стипендия тўлаш тўхтатилиши мумкин;
🔹 стипендияларни молиялаштириш Олий таълим, фан ва инновациялар вазирлиги ҳузуридаги Касбий таълим агентлиги орқали амалга оширилади;
🔹 Агентлик ва Рақамли технологиялар вазирлигига 2026 йил 1 августгача махсус платформани ишга тушириш вазифаси юклатилмоқда;
🔹 платформа «Ягона миллий меҳнат тизими» ва электрон ҳукумат инфратузилмалари билан интеграция қилинади.

Қайд этилишича, 2026 йилда харажатлар амалдаги бюджет доирасида қопланади, 2027 йилдан эса давлат бюджети параметрларида алоҳида назарда тутилади.

Тайёрлаган: Отабек Матназаров

#дуал таълим #Техникум