VEON Beeline Uzbekistan’нинг янги Тармоқ мониторинги ва бошқарув марказини тақдим этди ва BuildX’ни ишга туширди

26 январь куни Тошкент шаҳрида Beeline Uzbekistan’нинг янги Тармоқ мониторинги ва бошқарув марказини (Network Operations Center, NOC) расман тақдим этди. Тадбирда Ўзбекистон Республикаси рақамли технологиялар вазири Шерзод Шерматов, VEON Group бош ижрочи директори Каан Терзиоглу, шунингдек, Beeline Uzbekistan Кузатув кенгаши аъзолари ва компания раҳбарияти иштирок этди. Шу куни VEON, шунингдек, Ўзбекистонда ўзининг янги дастурий таъминот ва сунъий интеллект компанияси — BuildX’ни ишга туширди.

Beeline Uzbekistan’нинг Тошкентдаги Тармоқ мониторинги ва бошқарув маркази (NOC) рақамли бошқарув маркази сифатида фаолият юритиб, 5 850 дан ортиқ база станцияларини 24/7 режимида мониторинг қилади ҳамда 2025 йил сентябр ҳолатига кўра 7,7 миллион Beeline Uzbekistan абонентлари учун барқарор алоқа хизматларини таъминлайди. Проактив мониторинг маркази сифатида NOC тармоқдаги носозликларни реал вақт режимида аниқлаб, муҳандисларга аксарият ҳолларда фойдаланувчилар хизмат узилишларини сезишидан аввал муаммоларни тезкор бартараф этиш имконини беради. Марказ тармоқнинг асосий самарадорлик кўрсаткичларини доимий равишда кузатиб боради ва мустақил Opensignal таҳлилига кўра Ўзбекистондаги энг барқарор тармоқ сифатида эътироф этилган Beeline Uzbekistan тармоғида мижозлар тажрибасини янада мустаҳкамлайди.

NOC’дан ташқари, Beeline Uzbekistan компаниясида алоҳида Ахборот хавфсизлиги оператив маркази (Security Operations Center, SOC) ҳам фаолият юритади. Ушбу марказ тармоқ ва рақамли хизматлар доирасида киберхавфларни мониторинг қилади ва уларга тезкор жавоб чораларини кўради. IT ва дастурий таъминот жамоалари билан яқин ҳамкорликда ишлаган ҳолда, SOC мижозлар ва ҳамкорлар учун хавфсиз ва ишончли рақамли муҳитни таъминлашга хизмат қилади.

BuildX Тошкентдаги IT Park резиденти бўлган дастурий таъминот ва сунъий интеллектни ишлаб чиқиш соҳасидаги янги компания VEON’нинг мавжуд дастурий таъминот ишлаб чиқиш салоҳиятига таянади. Бу салоҳият Қозоғистондаги QazCode каби марказларни ҳам ўз ичига олади — у ерда сунъий интеллект асосидаги иловалар, булутли платформалар, корпоратив тизимлар ва маълумотлар таҳлили ечимлари ишлаб чиқилган. BuildX кенгайтириладиган ва экспортга йўналтирилган технологик ечимлар яратишга эътибор қаратади ҳамда Ўзбекистоннинг рақамли иқтисодиётини янада ривожлантириш ва Марказий Осиёдаги технологик марказ сифатидаги мавқеини мустаҳкамлаш йўлидаги интилишларига ҳисса қўшади.

“Ўзбекистонда рақамли трансформацияни қўллаб-қувватловчи пухта сиёсат асосида тез суръатларда ривожланаётган рақамли иқтисодиёт шаклланмоқда. Биз ушбу сиёсий пойдевор, кучли хусусий сектор вакиллари ва ёш рақамли мутахассисларимизга таянган ҳолда мамлакатимизни минтақавий технологик марказга айлантиришга қатъий бел боғлаганмиз”, — деди рақамли технологиялар вазири Шерзод Шерматов очилиш маросимида. VEON’нинг Ўзбекистон рақамли иқтисодиётига киритаётган узлуксиз инвестициялари ҳамда рақамли платформаларда мижозларга хизмат кўрсатиш, муҳим алоқа инфратузилмасини ривожлантириш ва рақамли кадрлар тайёрлаш каби йўналишларни қамраб олган ташаббуслари орқали бизнинг қарашларимизни фаол қўллаб-қувватлаётганини юқори баҳолайман”.

“Бугун эълон қилинаётган ушбу икки муҳим ташаббус Ўзбекистоннинг рақамли келажагига бўлган садоқатимизни яққол намоён этади. Замонавий Тармоқ мониторинги ва бошқарув марказимиз Beeline Uzbekistan’нинг мижозларига юқори даражадаги тажрибани таъминлаш имкониятларини янада кенгайтиради. BuildX эса ўзининг сунъий интеллект ва рақамли ечимлари орқали Ўзбекистон ва халқаро бизнеслар учун инсонлар ҳаётини яхшилайдиган ва хизматлардан фойдаланиш имкониятларини кенгайтирадиган ечимларни тақдим этади”, — деди VEON Group бош ижрочи директори ва Beeline Uzbekistan Кузатув кенгаши раиси Каан Терзиоглу. “Биз нафақат мижозларимиз ва бизнес ҳамкорларимизни қўллаб-қувватлашдан, балки ушбу ва бошқа ташаббуслар орқали Ўзбекистоннинг рақамли иқтисодиётга оид стратегик қарашларига ҳисса қўшишдан ҳам мамнунмиз”.

VEON’нинг шуъба корхонаси сифатида BuildX VEON Group, унинг операцион компаниялари ҳамда кенгроқ корпоратив бозор учун илғор дастурий таъминот, рақамли платформалар ва сунъий интеллект ечимларини ишлаб чиқади. Компания маҳаллий муҳандислар ва маълумотлар таҳлилчиларини жалб қилиш ва тайёрлаш орқали жамоасини кенгайтиришни режалаштирмоқда ҳамда Ўзбекистонда юқори малакали рақамли кадрлар салоҳиятини ривожлантиришга ҳисса қўшади. BuildX университетлар, стартаплар ва технологик ҳамкорлар билан яқин ҳамкорликда инновацияларни ривожлантириш ва маҳаллий технологик экотизимни мустаҳкамлашни мақсад қилган.

VEON ҳақида

VEON — қарийб 150 миллион алоқа фойдаланувчиси ва 140 миллиондан ортиқ рақамли фойдаланувчиларга хизмат кўрсатувчи глобал рақамли оператор ҳисобланади. Аҳолисининг 6% дан ортиғи истиқомат қиладиган беш мамлакатда фаолият юритган ҳолда, VEON технологияларга асосланган хизматлар орқали инсонлар ҳаётини ўзгартириб, иқтисодий ўсишни рағбатлантирмоқда. VEON NASDAQ фонд биржасида рўйхатга олинган. Батафсил маълумот: www.veon.com.

Beeline Uzbekistan ҳақида

Beeline Uzbekistan — мобил алоқа хизматлари орқали 7,7 миллион абонентга ва рақамли хизматлари ҳамда иловалари орқали 7,9 миллион ойлик фаол фойдаланувчига хизмат кўрсатувчи рақамли оператор. Компаниянинг рақамли портфелига Beepul молиявий иловаси, OQ рақамли бренди, яқинда ишга туширилган KINOM стриминг иловаси ҳамда hambi супер-иловаси киради. Шунингдек, Beelab ва VEON Adtech марказлари ҳам Ўзбекистонда жойлашган бўлиб, мамлакатдаги дастурий таъминот ва IT технологиялар экотизимини ривожлантиришга ҳисса қўшмоқда. Beeline Uzbekistan тўлиқ VEON’га тегишли компания ҳисобланади.

BuildX ҳақида

BuildX (МЧЖ «U-CODE») — BuildX бренди остида дастурий таъминот ва сунъий интеллект соҳасида фаолият юритувчи компания, Тошкентдаги IT Park резиденти. Компания рақамли ва сунъий интеллект бўйича VEON экспертизасидан фойдаланган ҳолда технологик ечимларни ишлаб чиқади.

Келажак ҳақидаги баёнотлар

Ушбу пресс-релиз АҚШнинг 1933 йилги Қимматли қоғозлар тўғрисидаги қонунининг 27А-моддаси ва 1934 йилги Қимматли қоғозлар алмашинуви тўғрисидаги қонунининг 21E-моддаси доирасида “келажак ҳақидаги баёнотлар”ни ўз ичига олади. Бундай баёнотлар VEON’нинг стратегик мақсадларига оид фикрларни ҳам қамраб олади. Турли хавф ва ноаниқликлар туфайли ҳақиқий натижалар мазкур баёнотларда ифодаланган кўрсаткичлардан сезиларли даражада фарқ қилиши мумкин. Ушбу хавфлар ҳақида батафсил маълумот VEON’нинг 2024 йил учун 20-F шаклидаги ҳисоботида (2025 йил 25 апрел) ва АҚШ Қимматли қоғозлар ва биржалар комиссиясига тақдим этилган бошқа ҳужжатларда келтирилган. Ушбу баёнотлар фақат пресс-релиз эълон қилинган санадаги ҳолатни акс эттиради ва қонунчиликда белгиланган ҳолатлардан ташқари, VEON уларни янгилаш мажбуриятини ўз зиммасига олмайди.