Эпштейн ҳужжатлари. Собиқ шаҳзода Эндрю Виндзордаги қасрни зудлик билан бўшатиб қўйди

Собиқ шаҳзода 2 феврал куни Виндзордаги Роял-Лож саройини тарк этган ва Англия шарқидаги Сандрингҳэм мулкидаги Вуд-Фарм қўрғонига бориб жойлашган.

BBC маълумотларга кўра, бу – Эндрю учун вақтинча қўналғадир: кейинроқ у қиролликнинг ушбу мулкидаги асосий саройдан тўрт километр масофада жойлашган ҳамда қироллик мезонлари бўйича жуда камтарона ҳисобланган Марш-Фарм қўрғонига кўчиб ўтади. Сандрингҳэм мулкининг умумий майдони – 80 км кв атрофида.

Букингҳэм сарой ўтган йил октябр ойи охирида Эндрю 2026 йил бошида бошқа жойга кўчиб кетишини эълон қилганди; Эпштейн иши бўйича ҳужжатларнинг навбатдаги партияси эълон қилиниши чиқиши эса бу жараённи тезлаштирган.

Британия жамоатчилиги Эндрю АҚШда педофилликда айбланиб қамалган Эпштейн билан муносабатлари юзасидан кўрсатма беришини қатъият билан талаб қилмоқда. Эндрю эса ҳеч қандай ноқонуний ишга алоқаси йўқлигини айтиб келади.

Сандрингҳэм – қирол Чарлз III’нинг хусусий мулки бўлиб, укасининг янги турар жойи учун барча харажатларни унинг ўзи тўлайди.

Эндрюнинг хулқ-атвори ва репутацияси анчадан буён қироллик хонадони учун жиддий муаммо бўлиб келган ҳамда шаҳзодага нисбатан қарорлар кечиктирилган ва етарли эмасдек туюлган.

Энди саройдагилар Эндрюнинг Сандрингҳэмга – қирол Чарлз ва қиролича Камилла яшовчи Лондондан ҳамда валиаҳд шаҳзода Уилям оиласи билан бирга истиқомат қиладиган Виндзордан узоққа кетиши – собиқ шаҳзода имкон қадар жамоатчилик эътиборидан четда бўлишига имкон беришидан умид қилмоқда.

У Виндзордаги ҳашаматли саройда яшаркан, бу жамоатчиликда норозилик уйғотаётганди.

Виндзор мулки ҳамда ундаги қироллик қасри, Сандрингҳэмдан фарқли ўлароқ, қиролга эмас, балки Молия вазирлигига ҳисобдор бўлган «Қироллик мулклари» номли махсус давлат муассасасига тегишли ҳисобланади.

Қироллик хонадонига яқин манбалар анонимлик шарти билан изоҳ беришича, бир томондан, оиладагилар хатолари учун Эндрюни қандайдир тарзда жазолаш зарурлигини тўғри тушунди, бошқа томондан, у ҳамон оила аъзоси ва унга ғамхўрлик қилиш керак. Шунинг учун қирол унга ўз ҳисобидан Норфолкда яшаш учун уй берди.

Октябр ойида қирол укасини шаҳзодалик унвонидан ва унда қолган бошқа барча титуллардан маҳрум этганди, ундан олдинроқ Эндрюнинг ўзи ўз ихтиёри билан Йорк ҳерцоги унвонидан воз кечганди.

Эндрю яқин вақтлар ичида қолган буюмларини ҳам олиб кетиш учун Виндзорга яна келиши кутилмоқда.

Уни Виндзорда сўнгги бор душанба куни кўришган – у қўрғон атрофида отда сайр қилиб юргандаги сурати тарқалган. Бундан ташқари, уни Виндзор қалъасидан машинада чиқаётганида суратга олишган. Саройдагиларга эса унинг қўл силкиб тушган бу суратлари ёқмаган.

Октябр ойида саройга яқин манбалар Эндрюнинг саройни тарк этиши кейинги йилга қолдирилгани ҳақида хабар берилганди – қироллик хонадони аъзолари Рождествони Сандрингҳэмда кутиб олишган ва у ерда Эндрю ҳам бўлишини исташмаган.

Сандрингҳэм 1862 йилда ўша вақтдаги Уэлс шаҳзодаси Алберт (кейинроқ Эдвард VII) томонидан сотиб олинганди.

Ушбу мулк ҳудудида бир нечта қишлоқ ва хуторлар, шунингдек, тахминан 40 км. кв майдонни эгалловчи қишлоқ хўжалиги ерлари мавжуд. Мулкнинг асосий биноси – Сандрингҳэм-Ҳаус – баъзи маълумотларга кўра, бал залини ҳам ўз ичига олган юздан ортиқ хоналардан иборат.

Маунтбеттен-Виндзорнинг Жеффри Эпштейн билан алоқалари бўйича тергов давом этмоқда. Британия полицияси америкалик адвокат Брэд Эдвардснинг Эпштейн камида бир марта, 2010 йилда шаҳзода Эндрю билан жинсий алоқа қилиш учун бир аёлни Буюк Британияга юборгани ҳақидаги баёнотини ўрганмоқда.

Эпштейннинг қурбонлари манфаатларини ифода этувчи ушбу ҳуқуқшунос Буюк Британия фуқароси бўлмаган ҳамда 20 ёшдан кичик бўлган ушбу аёлни Роял-Ложда қабул қилгани, тунни у билан ўтказгани, кейин эса унинг учун Букингҳэм саройида экскурсия уюштиргани ҳақида айтиб берган.

BBC Эндрю Маунтбеттен-Виндзордан изоҳ сўраган, аммо у ҳали жавоб қайтармаган, бунгача берган баёнотларида эса ҳар қандай қонунбузарликка алоқдорлигини қатъиян рад этган.

Бу аёлнинг Роял-Ложда ўтган кеча ҳақидаги ҳикояси – Эпштейннинг қурбони тунни қироллик қароргоҳида ўтказгани билан боғлиқ биринчи ҳолатдир.

Шаҳзода Эндрюга нисбатан бундай «учрашувлар» бўйича илк айблов 2014 йилда Виржиния Жуффре томонидан эълон қилинганди. У 17 ёшлигида Эпштейн ва унинг ёрдамчиси Гислейн Максвелл уни Эндрю билан жинсий алоқа қилишга мажбурлагани ҳақида айтиб берганди. Собиқ шаҳзоданинг ўзи эса бу каби ишлар бўлганини тан олмаган.

Жуффре 2021 йилда АҚШда Эндрюга қарши фуқаролик даъвоси қўзғатади, 2022 йил февралида иш томонларнинг келишувига кўра ёпилади, норасмий хабарларга кўра, ўшанда Виржиния Жуффрега 12 млн фунт тўлаб берилган.

2025 йил Жуффре ўз жонига қасд қилди.

АҚШда Эпштейн иши бўйича ҳужжатларнинг сўнгги қисми эълон қилинишидан кейин собиқ шаҳзоданинг Эпштейн билан алоқалари яна эътибор марказига тушди.

АҚШ Адлия вазирлиги томонидан эълон қилинган минглаб фотосуратлар орасида собиқ шаҳзода полда чалқанча ётган аёлнинг тепасида тўрт оёқлаб тургани акс этган сурат ҳам бор, шунингдек, уч миллион саҳифали матнли ҳужжатлар орасида Эпштейн ва Эндрю ўртасидаги электрон ёзишмаларнинг навбатдаги парчалари мавжуд бўлиб, бу ёзишмалар Эпштейн вояга етмаганларни йўлдан оздирганини тан олган вақтга мансубдир.