Анапада талаба Саноат техникуми ҳоллида ўт очди. У икки стволли (қўшоғиз) милтиқдан 13 бор ўқ узган, деб хабар берди Россиядаги кучишлатар тузилмаларга яқин бўлган телеграм-каналлар. Қурол талабанинг қариндошларидан бириники бўлган. Ҳужум қилган шахс қўлга олинган, у ҳодисадан кейин қўлини кўтарди ва полицияга таслим бўлди, деб хабар берди «ЧП Анапа» телеграм-канали. Тергов қўмитаси ҳолат юзасидан жиноий иш очилганини маълум қилди.
Техникум қўриқчиси ўлдирилган. Краснодар ўлкаси губернатори Вениамин Кондратев қўриқчи «зарбани ўзига қабул қилиб, зудлик билан ҳаракат қилгани ва ҳуқуқ-тартибот органларини чақиргани» ҳамда ҳужум қилган шахсни техникумга киритмаганини маълум қилган. Яна икки киши ўртача оғирликда жароҳат олган.
Техникумга 17 ёшли ўсмир ҳужум уюштирган. Кучишлатар тузилмаларга яқин бўлган телеграм-каналлар ёзишича, у Иля О. бўлиб, унинг фамилияси очиқланмаяпти. «Осторожно, новости» маълумотига кўра, Иля 2025 йилда ижтимоий тармоқларда ўқув муассасаларига қилинган ҳужумлар билан боғлиқ контентларни жойлашни бошлаган. Бир неча кун муқаддам у тиктокдаги саҳифаси тавсифидаги ёзувни «Гуноҳи йўқ одам бўлмайди» сўзларига ўзгартириб қўйган.
Ёзишмаларига қараганда, ушбу ўсмир техникумга ҳужумни камида 7 январдан буён режалаштириб келган, деб ёзади «Осторожно, новости». Аввалига Иля ҳужумни 20 феврал куни амалга оширмоқчи бўлган. У отишмани гўёки пора берганига қарамай, ўзига диплом берилмагани туфайли уюштиргани ҳақидаги версия ҳам бор. Бу ҳақда «ЧП Анапа» телеграм-канали талабалардан бирига таяниб хабар берган. Бу маълумот тасдиғини топмаган.
Ҳужумдан бир неча ой олдин – 2025 йил августида – техникумда аксилтеррор машғулотлар ўтказилганди, деб хабар беради «Агентство». Техникум машғулотлар «муваффақиятли ўтгани», коллектив «фавқулодда вазиятлар юзага келганда қандай ҳаракатланиш бўйича юқори тайёргарлик» намойиш этгани ҳақида ҳисобот эълон қилган.
