Қўшимча функционаллар
-
Тунги кўриниш
Эпштейн иши: Европа кенгаши собиқ бош котибнинг дахлсизлигини бекор қилди
Сиёсатчининг Эпштейн билан алоқалари сабаб Норвегияда Турбёрн Ягландга нисбатан тергов бошланган. Терговни давом эттириш учун полиция ундан дахлсизликни олиб ташлашни сўраган эди.
Фото: canpix/Caro / Ruffer
Европа кенгаши вазирлар қўмитаси америкалик молиячи Жеффри Эпштейн иши бўйича ҳужжатлар эълон қилинганидан кейин Норвегияда бошланган тергов муносабати билан Норвегиянинг собиқ бош вазири ва Европа кенгашининг собиқ бош котиби Турбёрн Ягланддан иммунитетни олиб ташлади.
Бу қарор “Норвегия адлия тизими ўз ишини бажаришига, Ягланд жаноблари эса айблов қўйилган тақдирда ўзини ҳимоя қилишига” имкон беради, деди Европа кенгашининг амалдаги бош котиби Ален Берсе 11 феврал, чоршанба куни. Ягланднинг адвокати эса мижози бу ишга жиддий қарайди, деб жавоб берди, бироқ “жиноий таъқибга алоқадор ҳеч қандай далил йўқ”лигини таъкидлади.
Бундан олдин Норвегия полициясининг иқтисодий жиноятларга қарши кураш бўлими — Oekokrim Ягландга нисбатан оғир коррупция жиноятларига оид шубҳалар мавжудлиги сабаб тергов бошлаган.
“Oммани хабардор қилинган ҳужжатлар қамраб олган даврда у Норвегия Нобел қўмитаси раиси ва Европа кенгаши бош котиби лавозимларини эгаллагани учун текширув ўтказишга жиддий асослар бор, деб ҳисоблаймиз”, — деди Oekokrim раҳбари Паал Лёсет. У тергов бошланишига Эпштейн иши бўйича янги эълон қилинган материаллардаги маълумотлар асос бўлганини тушунтирди. Ҳозирча Ягландга нисбатан ҳеч қандай айблов қўйилмаган.
Норвегиянинг Verdens Gang газетаси (Эпштейн иши материалларида Ягландга доир қисмни ўрганиб чиққан) хабарига кўра, Ягландда Жеффри Эпштейн томонидан квартира хариди учун кафолат бўлган. Шунингдек, сиёсатчи бир неча марта Эпштейннинг Ню-Йорк ва Париждаги квартираларида тунаган. AFP агентлиги ёзишича, 2014 йилда Ягланд ва унинг оиласи Эпштейннинг оролига сафар режалаштирган, аммо кейинчалик у бекор қилинган.
Ягланднинг таъкидлашича, Эпштейн билан алоқалари “одатий дипломатик фаолият”нинг бир қисми бўлган. Феврал ойи бошида у Aftenposten газетасига бу муносабатларни сақлаб қолгани “хатолик” бўлганини тан олган.
Ягланд Норвегия бош вазири лавозимида 1996–1997 йилларда ишлаган, 2009–2015 йилларда Нобел тинчлик мукофотини бериш қўмитаси раиси бўлган, 2009–2019 йилларда эса Европа кенгаши бош котиби вазифасини бажарган.
