Залужний Украина президентини қарши ҳужум барбод бўлишида айблади

Залужний сўзларига кўра, ўзи ва Зеленский ўртасидаги биринчи тортишувлар Россиянинг Украина билан катта уруши бошланганидан кейин деярли дарҳол пайдо бўлган. Зиддият 2022 йил кузида Украина Хавфсизлик хизматининг (УХХ) ўнлаб ходимлари Залужний кабинетига тинтув ўтказиш учун келганида жиддий нуқтага етган.

Залужний бу 2022 йил сентябрь ойи ўрталарида, Украина Қуролли кучлари мамлакат шимоли-шарқида қарши ҳужум уюштирганида содир бўлганини айтди. Унинг Киевдаги кабинетига УХХ ўнлаб агентлари - у ерда Британия зобитлари бўлган пайтда кириб келган. УХХ ходимлари айнан нимани қидираётганини тушунтирмаган, аммо Залужний уларга ҳужжатлар ва компьютерларни текширишга рухсат бермаган. Собиқ бош қўмондоннинг фикрича, тинтув «қўрқитиш ҳаракати» эди.

Залужний УХХ ходимлари олдида Зеленскийнинг ўша пайтдаги офиси раҳбари Андрей Ермакка қўнғироқ қилиб, «бу ҳаракатни қайтаришини, чунки қандай жанг қилишни билишини» айтган. Залужний, шунингдек, бунинг учун ҳарбийларни жалб қилишга тайёрлигини маълум қилган.

Бундан ташқари, у ўша пайтда УХХ раҳбари бўлган Василий Малюкка қўнғироқ қилган. У тинтув ҳақида ҳеч нарса билмаслигини айтган. Кейинчалик Залужний бундан икки кун олдин УХХ Киев судидан ўз идораси жойлашган манзилда тинтув ўтказиш учун ордер сўраганини билиб олган. Шу билан бирга, ордерда ушбу манзилда жиноий ташкилот томонидан бошқариладиган стриптиз клуби жойлашгани ва унда тинтув ўтказиш режалаштирилгани айтилган. Бироқ, муассаса Россия босқинидан олдин ҳам ёпилган эди, деб таъкидлайди AP. Залужнийнинг фикрича, УХХ бу ҳақда билмаслиги мумкин эмасди.

Зеленскийнинг идораси ва УХХ ушбу баёнотларга изоҳ беришдан бош тортди.

AP нашрига берган интервьюсида Залужний, шунингдек, НАТО ҳамкорлари билан биргаликда 2023 йил ёзида ишлаб чиқилган қарши ҳужум режаси Зеленский ва бошқа амалдорлар зарур ресурсларни ажратмагани учун муваффақиятсизликка учраганини айтди.

Собиқ бош қўмондон сўзларига кўра, дастлабки режа Запорижжя областини озод қилиш учун етарли кучларни «ягона муштда» тўплаш, кейин эса Азов денгизига чиқиш эди. Бу Россия томонидан аннексия қилинган Қримнинг таъминот йўлини кесиб қўйиш имконини берарди. Залужний фикрига кўра, бунинг учун кенг кўламли, консентрациялашган кучларни тўплаш ва тактик кутилмаган ҳаракатлар керак эди.

Бунинг ўрнига, Залужнийнинг сўзларига кўра, кучлар кенг ҳудуд бўйлаб тарқалиб кетган, бу эса уларнинг ҳужум кучини заифлаштирган.

2023 йил декабр ойида Зеленский Украина қарши ҳужум натижасида керакли натижаларга эриша олмаганини айтганди. Унинг сўзларига кўра, Киев иттифоқчилардан керакли қуролларни олмаган, Украина қуролли кучларининг чекланган сони эса тезкор ҳужумга ўтишга имкон бермаган.

AP нашрига берган интервюсида Залужний фронтда содир бўлаётган воқеаларни диққат билан кузатиб бораётганини, бироқ Зеленский уни 2024 йил февралида истеъфога чиқарганидан бери ҳарбий қарорлар қабул қилишда иштирок этмаётганини айтди. Собиқ бош қўмондон сўзларига кўра, шундан бери у президент билан икки марта «дўстона» оҳангда суҳбатлашган. Залужний ўзининг сиёсий амбициялари ҳақида гапиришдан бош тортади. «Уруш тугамагунча ёки ҳарбий ҳолат бекор қилинмагунча, мен буни муҳокама қилмайман», деди у.

Залужнийга маслаҳатчилар ва партия амалдорлари мурожаат қилиб, сайлов кампаниясини ишлаб чиқишда ёрдам беришни таклиф қилмоқда, дейилади Associated Press материалида. 2025 йил баҳорида, Залужний сўзларига кўра, унга америкалик «анча таниқли» сиёсий маслаҳатчилар мурожаат қилган. AP манбасига кўра, гап Доналд Трампнинг сайловолди штаби собиқ раҳбари Пол Манафорт ҳақида кетмоқда. «Мен унга эътибор учун миннатдорчилик билдирдим, лекин унинг хизматлари менга керак эмаслигини айтдим», деди Залужний.

Валерий Залужний бир неча бор Украинада президентлик сайловлари ўтказилган тақдирда Зеленскийнинг асосий рақиби деб аталган. 2026 йил январ ойи бошида натижалари эълон қилинган сўровга кўра, респондентларнинг 23 фоизи Залужнийга, 20 фоизи Зеленскийга овоз беришга тайёр.

2026 йил февраль ойи бошида Financial Times газетаси манбаларга таяниб, Зеленский 24 феврал - катта урушнинг тўрт йиллиги муносабати билан сайловлар ўтказилишини эълон қилиши мумкинлиги ҳақида хабар берган эди. Зеленский бунга жавобан: «Бу ҳақда биринчи марта эшитяпман», деди.