АҚШ Шри-Ланка соҳиллари яқинида Эрон кемасига зарба берди (видео)

Кема чўкиб кетган, Шри-Ланка қутқарувчилари экипаж аъзоларидан 32 нафарини эвакуация қилишган. Кемада қанча одам бўлгани номаълум, 140 ортиқ киши бедарак кетгани айтилмоқда.

Фото: Видеодан кадр

Америка сувости кемаси Ҳинд океанида Шри-Ланка қирғоқлари яқинида Эрон ҳарбий кемасини чўктириб юборди. Бу ҳақда дастлаб Reuters агентлиги манбаларга таяниб хабар тарқатди. Кўп ўтмай Пентагон раҳбари Пит Ҳегсет махсус брифингда ушбу кемани америкаликлар торпедоси чўктирганини тасдиқлади.

«Америка сувости кемаси Эроннинг халқаро сувларда ўзини хавфсиз деб ҳисоблаган ҳарбий кемасини чўктириб юборди», – деган Ҳегсет.

У Эрон ҳарбий-денгиз кучлари Америка-Исроил қўшма амалиётининг асосий нишонларидан бири эканини таъкидлаган.

Унинг сўзларига кўра, америкалик ҳарбийлар Форс кўрфазида Эрон ҳарбий-денгиз кучларининг асосий жанговар кемасига ҳам зарбалар йўллаган. Гап Доналд Трампнинг биринчи президентлиги даврида Ироқда америкалик ҳарбийлар томонидан ўлдирилган эронлик собиқ генерал Қосим Сулаймоний шарафига номланган «Сулаймоний» номли кема ҳақида кетмоқда.

4 март куни тонгда Шри-Ланка соҳилидаги Галле шаҳри яқинида Эроннинг «Дена» (IRIS Dena) номли ҳарбий фрегати ҳалокат сигнали юборгани хабар қилинганди. Кўп ўтмай кема чўкиб кетган. Шри-Ланка ҳукумати бортда бўлган 32 кишини қутқарган, шунингдек, денгиздан бир қанча жасадлар олиб чиқилган.

Кемада айнан қанча одам бўлгани маълум эмас.

Reuters агентлиги Шри-Ланка ТИВга асосланиб берган сўнгги хабарга кўра, ҳужум оқибатида камида 80 киши ҳалок бўлган.

Тайёрлаган Азиз Қаршиев

#Эрон #Шри-Ланка

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.