Консерватор журналист Такер Карлсоннинг айтишича, Трамп Нетаняҳунинг босими остида ҳатто Эронга ядровий зарба бериши ҳам мумкин.
Имкониятлар қандай?
Келинг, аввало, Нетаняҳу ва Трампнинг ҳукуматни сақлаб қолиш имкониятига тўхталамиз. АҚШ президентида вазият яхшироқ. Конгресснинг иккала палатаси назорати ҳам демократларга ўтиб кетиши катта сенсация бўлади. Қуйи палата қўлдан кетса, кейинги икки йил Трамп учун қийин кечади, лекин энг асосийси Сенат устидан назорат. Ҳозирча демократлар Сенатни эгаллаши бўйича жиддий сигналлар йўқ.
Нетаняҳу эса тушунарсиз вазиятда. Унинг партияси яна энг кўп овоз олди, лекин мухолифат ҳам ёмон қатнашмади. Нетаняҳу қайта сайловсиз ҳукуматда қолиш учун фақат мухолифат билан бирлашиши керак, бошқача имкони йўқ. Агар мухолифат араблар билан бирлашса, Нетаняҳу кетиши ҳам мумкин. Бибида бу нарсани ҳал қилиш учун бир ҳафта вақт бўлади.
«Эронга ядровий зарба берилиши мумкин»
Америкалик журналист Такер Карлсон эсингизда бўлса керак. Трампнинг ҳар икки сайлов кампаниясида уни фаол қўллаган, рақибларига лой чаплаган, Кремлга яқинлиги билан танилган, уруш даврида Москвада Путиндан интервю олиб, руслар учун ниҳоятда фойдали ишлар қилган консерватор журналист. Ана шу республикачи қараса, мистер президент «America first» тамойилидан чекиниб, ҳамма ерни «Israel first» қилиб юборяпти. Шунда Карлсон бир думалаб, Трамп жамоаси аъзосидан Трампнинг танқидчисига айланиб қолди.
Ана шу Такер Карлсоннинг айтишича, Трамп Исроил бош вазири Нетаняҳунинг босими остида Эронга ядровий зарба бериши мумкин. Журналист санасини ҳам ёзди, 7 ноябр! Ёки АҚШда ҳам сайлов натижаларини аввалдан «пишитиб қўйишганмикин?» Карлсонга кўра, ядровий зарба берилиши мумкин бўлган жой ҳам аниқ экан: америкаликлар Пикакс деб атайдиган Кўҳи коланг тоғи. Америкалик мана шу тоғ остида Эрон ядро дастурининг асосий объектлари жойлашган деб ҳисоблайди.
Эсингизда бўлса, АҚШ ўтган йили ёзда Эрондаги Фордо, Натанз деган уранни бойитиш заводларига зарба берганди. Кўҳи коланг ҳам улардан узоқда эмас. Қизиқ, асосий бино шу ерда экан, унда нега АҚШнинг B2 бомбардимончилари тонна-тонна керосин сарфлаб, Эронгача учиб борди-да, «энг асосий бинони» урмай келди? Эсингиздан чиқиб қолганми? Нега унда Трамп чиқиб, «биз Эрон ядро дастурини йўқ қилдик» деганди?
Америкалик журналистлар шов-шувга ўч, уларнинг гапини жиддий қабул қилиш керак эмас деган бўлардим, лекин Такер Карлсон жиддий одам, ишонинг. Бу Трампнинг бошқа давлат лидерлари билан музокараларида қатнашган, Американинг энг юқори мартабали мулозимлари билан ҳамсуҳбат бўлган, Американинг Исроилдаги элчисини соатлаб камера қаршисида сўроққа тутадиган катта одам. Бу одам «Америка Эронга ядро зарбаси бериши мумкин», деб осмондан олиб гапирадиганга ўхшамайди. «Бундай ядровий зарбадан кейин учинчи жаҳон урушидан қочиб бўлмайди», деб ёзади Карлсон.
