Сергей Шойгунинг яна бир собиқ ўринбосари қўлга олинди

Бунгача Шойгунинг уч нафар ўринбосари бюджет маблағларини талон-торож қилишда гумонланиб, терговга жалб этилганди. Цаликов 30 йил Шойгу билан ишлаган ва унинг жамоасидаги энг яқин одами эди. Шойгу уни қутқаришга ҳаракат қилиб, Тувага юборганди, аммо энди унинг ўзининг позицияси ҳам заифлашгани маълум бўлмоқда.

Фото: Artyom Geodakyan/TASS

Россия мудофаа вазирининг собиқ биринчи ўринбосари Руслан Цаликов бюджет маблағларини талон-торож қилган жиноий уюшма тузиш иши бўйича қўлга олинди. У Мудофаа вазирлиги собиқ раҳбари Сергей Шойгунинг 2024 йил баҳоридан бери терговга тортилган тўртинчи ўринбосари бўлди.

Россия Тергов қўмитаси Цаликов талон-торож қилиш ва пул ювиш бўйича 12 та, шунингдек, пора олиш бўйича иккита эпизодда гумонланувчига айланганини маълум қилган.

Тергов версиясига кўра, Цаликов жиноий уюшма тузган, унинг аъзолари 2017–2024 йилларда бюджет маблағларини ўғирлаб, уларни «ювиш» билан шуғулланган.

Бу даврда Сергей Шойгунинг узоқ йиллик сафдошларидан бири бўлган Цаликов мудофаа вазирининг биринчи ўринбосари лавозимида ишлаган ҳамда идоранинг медиа ва PR-фаолиятига масъул бўлган.

«Коммерсант» манбаларига кўра, гап армия учун ашёвий мулкларни «Военторг» компанияси орқали оширилган нархларда етказиб бериш ҳақида кетмоқда.

Тергов версиясига кўра, ноқонуний даромадлар кейин кўчмас мулкларга пул сармоя киритиш орқали легаллаштирилган, давлатга етказилган жами зарар миқдори тахминан 6,6 млрд рублга баҳоланмоқда.

Терговчилар тахминига кўра, Цаликов порани 2019 ва 2020 йилларда РФ мудофаа вазирлиги учун тадқиқот ва қидирув ишларини олиб бориш билан шуғулланган компаниялардан олган.

«Коммерсант» манбасига кўра, Цаликов айбига иқрор бўлмаган, аммо ҳақиқат юзага чиқиши учун кучишлатар идоралар билан ҳамкорликка тайёрлигини билдирган.

Мудофаа вазирлигида раҳбарият алмашинуви Россиянинг Украинага қарши кенг кўламли уруши бошланганидан тахминан икки йил ўтиб рўй берганди.

2024 йил июнида, Андрей Белоусов янги мудофаа вазири этиб тайинланганида, Цаликов Шойгунинг бошқа ўринбосарлари билан биргаликда вазирликни тарк этганди.

2024 йил сентябрида Цаликов Тива парламенти депутатига айланади – бу Шойгу туғилган региондир. У ушбу республикадан сенатор бўлиши кутилганди, аммо якунда унинг номзоди илгари сурилмай қолди.

Шойгу мудофаа вазирлигидан кетганидан кейин бир қанча юқори мартабали мулозимлар, жумладан, унинг икки ўринбосари Павел Попов ва Дмитрий Булгаков ҳибсга олинди. Шойгунинг яна бир ўринбосари, Тимур Иванов унинг истеъфосидан уч ҳафта олдин терговга жалб этилганди.

Шойгунинг ўзи истеъфодан кейин Россия Хавфсизлик кенгаши котиби лавозимини олган.

BBC рус хизмати мухбири Иля Барабанов: Цаликов ҳибсга олиниши – Шойгуга жиддий зарба

Руслан Цаликов Сергей Шойгунинг тергов изоляторига жойлаштирилган тўртинчи собиқ ўринбосари бўлди. Шу билан бирга, у Шойгуга жамоасининг унга энг яқин бўлган аъзоси эди.

Улар 30 йилдан ортиқ вақт давомида бирга ишлаган. Цаликов ФВВ тузилмасига 1994 йилда ишга келган. Шойгу Москва областига қисқа муддатга губернаторлик қилганида уни ўзининг вице-губернатори қилиб олган. Кейин у билан бирга Мудофаа вазирлигига кўчиб ўтганди.

Шойгу истеъфога чиқишидан бироз олдин унинг ўринбосари Тимур Иванов, ундан кейин эса Дмитрий Булгаков ва Павел Попов ҳибсга олинган. Шойгу Цаликовни қутқаришга ҳаракат қилди. Шимолий Осетияда туғилган собиқ ўринбосарини ўз ватани Тувага юборди, у ерда у Олий Хурал депутати этиб сайланди, кейин эса ушбу региондан Федерация Кенгаши аъзоси бўлиши режалаштирилганди.

2024 йил сентябр ойида, Тува депутатлари Цаликовни Москвага кўтариш масаласини кўриб чиқмайдиган ва у сенаторга айлана олмайдиган бўлгач, Цаликов заиф позицияда қолаётгани ва Шойгунинг ён босиши унга ёрдам бермаслиги маълум бўлганди.

Энди, орадан бир ярим йил ўтиб, собиқ мудофаа вазири жамоасининг энг яқин аъзоси ҳибсга олинди. Демак, Сергей Шойгунинг позицияси ҳам исталган вақтда заифлашиши мумкин.