Германия Шойгу баёнотига таяниб, Россиядан бўлган дезертирга бошпана бермади

BAMF идораси билдиришича, Россияда сафарбарлик йўқ, чунки бу ҳақда 2022 йил октябрида ўша пайтдаги РФ мудофаа вазири Сергей Шойгу айтган. BAMF фикрича, дезертирни ватанининг ўзида фақат жарима жазоси кутяпти, холос.

Фото: AP

Германиянинг Миграция ва қочқинлар ишлари бўйича федерал идораси (BAMF) россиялик Георгий Авалианига бошпана беришни рад этди. У Украинага қарши урушга “қисман сафарбарлик” доирасида чақирилган ва фронтдан қочиб кетган. BAMF рад жавобини шу билан асослаганки, Россияда сафарбарлик 2022 йилдаёқ тугаган, демак, Авалианининг ҳаётига РФда хавф йўқ. Бу ҳақда жума куни, 23 январда “Прощай, Оружие!” ҳуқуқни ҳимоя қилувчи лойиҳасининг ҳарбий таҳлилчиси Алексей Алшанский X ижтимоий тармоғидаги саҳифасида хабар берган.

Алшанский маълумотларига кўра, Авалиани 2022 йил сентябрда сафарбар қилинган. Бир ой ўтиб у фронтдан қочишга уринган, аммо ушланган ва “қийноқ ертўласи” деб аталувчи жойга ташланган, у ерда бир неча ҳафта давомида унга азоб-уқубат етказилган: “ток, калтаклаш, отиб ташлашни имитация қилиш”. Кейинроқ Авалианини яна фронтга қайтаришган, аммо у ҳоспиталга тушган ва ўша ердан Россияга чиқиб кетишга ҳамда ҳарбийлардан яна қочишга муваффақ бўлган. Бироқ охир-оқибат уни иккинчи марта ҳам тутишиб, ҳарбий қисмга олиб боришган. Бир ойдан кейин Авалиани учинчи марта ҳам қочган ва бу сафар РФдан чиқиб кетган.

Алшанскийнинг айтишича, дезертир икки йил давомида қочқин ҳолатида яшаган, шу вақт ичида эса Россияда унинг оиласи таъқиб қилинган. Авалиани Германияга 2025 йилда яқинлари билан Хорватиядан келган. Алексей Алшанский ёзишича, у ерда “бошпана олиш имконияти йўқ”.

Авалианининг бошпана ҳақидаги аризасини кўриб чиққан немис идоралари рад жавобини берган ва буни шунга боғлаган: 2022 йил октябрида РФнинг ўша пайтдаги мудофаа вазири Сергей Шойгу мамлакат президенти Владимир Путинга сафарбарлик якунлангани ҳақида хабар қилган. Алшанский сўзларига кўра, рад жавобини ёзган немис амалдори Украинадаги Россия кучларида “қийноқ ертўлалари” мавжудлигига шубҳа қилган ва Георгий Авалиани ҳамда унинг оиласи Россияга қайтганда уларга фақат 30 минг рубл (тахминан 330 евро) миқдорида жарима таҳдид қилади, деган хулосага келган.

Алексей Алшанский фикрича, рад жавобининг матни BAMF Авалианининг аризасини моҳиятан кўриб чиқмаганини, аксинча “барча россиялик чақирувдан қочганларга одатда бериладиган автожавоб”ни юборганини кўрсатади. Таҳлилчи айтишича, BAMF ҳатто ҳарбий хизматчини фуқародан ажрата олмаган. Ҳуқуқ ҳимоячиси билдиришича, эндиликда Георгий Авалиани ГФРда бошпана олиш учун суд орқали курашади.

2022 йил 24 февралдан 2026 йил 13 январгача бўлган даврда РФнинг Украинага қарши урушида камида 163 606 нафар россиялик ҳарбий хизматчининг ҳалок бўлгани тасдиқланган. Бу 16 январ куни эълон қилинган, BBC рус хизмати ва “Медиазона” нашри янгилаган рўйхатдан келиб чиқади. Ушбу рўйхат кўнгиллилар жамоаси иштирокида очиқ манбалардаги маълумотлар асосида тузилади.

Маълумотномада Россия армияси ва бошқа куч тузилмаларидаги 6300 дан ортиқ офицер (6302 нафар) ҳалок бўлгани тасдиқлангани айтилади. 2024 йил сентябрига келиб йўқотишлар сони бўйича биринчи ўринга яна кўнгиллилар (53 976 нафар, 33 фоиз) чиққан (шунга ўхшаш тенденция 2022 йил ёзи бошидан куз ўрталаригача ҳам кузатилган) — бу кумулятив таъсир натижаси экани таъкидланади. Шу вақтга келиб қамоқхоналарда ёллаш кескин камайган, Россияда эса янги сафарбарлик эълон қилинмаган.