Европадаги супермаркетлар тармоқлари янги ҳакерлик ҳужумлари ҳақида маълум қилди. Ҳужумлар оқибатида совитиш ускуналари муздан халос бўлиш режимига ўтиб кетган.
Reuters нашрининг ёзишича, Ahold Delhaize ва Colruyt тармоқлари раҳбарияти 2 ноябрь куни ушбу ҳужум Бельгия ва Люксембургдаги бир неча ўнлаб дўконларга таъсир кўрсатганини маълум қилган. Ahold Delhaize тармоғидаги совитиш ускуналари учун масъул бўлган Sabcobel компанияси Бельгиянинг Belga ахборот агентлигига гап ҳакерлик ҳужуми ҳақида кетаётганини билдирган. Colruyt (Бельгиядаги Spar дўконлари оператори) эса бешта дўконда совитиш ускуналари ишдан чиққанига аниқлик киритган.
Yle нашрининг ёзишича, Швециянинг ICA супермаркетлар тармоғи ҳам музлатгичлар ишидаги носозликлар ҳақида хабар берган. Компания маълумотларига кўра, музлатгичлар 50°C ҳароратли муздан халос бўлиш режимига ўтиб кетган ва бунинг оқибатида кўплаб маҳсулотлар айниб қолган. Aftonbladet газетасининг хабар беришича, шунга ўхшаш муаммо Швециянинг марказий қисмидаги Coop Group’га қарашли олтита дўконда ҳам кузатилган.
Reuters агентлигининг хабар беришича, Эстониядаги супермаркетлар тармоқларидан бири ҳам шундай муаммога дуч келган. Тармоқ номи ва бошқа тафсилотлар ошкор этилмаяпти.
Европа давлатларининг ҳуқуқ-тартибот идоралари ҳакерлик ҳужуми ортида ким турганини ҳозирча маълум қилмади.
Октябрь ойида ҳакерлар Франциядаги турли тармоқларга қарашли бир неча юзлаб супермаркетларнинг совитиш ускуналари ишига ноқонуний аралашган эди. Шунда ҳам ёвуз ниятли кимсалар музлатгичларни 50°C ҳароратли иситиш режимига ўтказиб қўйган. Шунингдек, Нидерландияда ҳам ўз супермаркетларига эга бўлган Ahold Delhaize тармоғи ўз иловаси ишида узилишлар юз берганини маълум қилганди.
