Украина яна Москва областига зарба берди

Украина 20 июлга ўтар кечаси Москва областига дронлар билан навбатдаги ёпирилма ҳужумини амалга оширди. Сўнгги маълумотларга кўра, 10 киши жароҳат олган.

Энг кўп жабрланувчилар Домодедово шаҳрида – етти киши. Шундан олти нафари, жумладан, Хитойнинг уч нафар фуқароси шифохонага ётқизилди, деб хабар берди ҳудуд губернатори Андрей Воробев. Жабрланувчилардан тўрт нафарида – осколкали жароҳатлар қайд этилган, 53 ёшли эркакнинг бели синган, 26 ёшли йигитнинг тиззаси жароҳат олган. Бундан ташқари, Подолскда икки аёл жароҳат олган, уларга воқеа жойида тиббий ёрдам кўрсатилган. Одинцоо округида 11 ёшли қизчага кучли стресс ташхиси қўйилган. Домодедово шифохонасидагилар хабар қилишича, олти киши кичик жароҳатлар билан олиб келинган.

Воробев маълум қилишича, дронлар ҳужуми оқибатида бир нечта хусусий уйлар ва «фуқаролик инфратузилмасининг алоҳида объектлари» шикастланган. У шикастланган объектлар тўғрисида батафсил маълумот келтирмаган. Дронлардан бири М-4 трассасига қулаган. Домодедово шаҳар округи раҳбари Евгения Хрусталева маълум қилишича, «Жанубий дарвоза» («Южные врата») индустриал парки ҳудудида ёнғин чиққан. Дронлардан яна бири Курижова кўчасидаги уйлардан бирининг юқори қаватига урилган.

Astra нашри ижтимоий тармоқларда тарқалган видео ва фотосуратларни таҳлил қилган ҳолда, Подолскда нефт базаси ҳужумга учраб, ёнғин чиққани ҳақида хулосага келган. «Агентство» нашри аниқлик киритишчиа, гап Львовский микрорайонидаги нефт базаси ҳақида кетмоқда.

Коледино қишлоғи (Подолск шаҳар округи таркибида) аҳолиси Wildberries логистика марказида ёнғин содир бўлгани ҳақида хабар берган. Wildberries матбуот хизмати компания омбори одатдаги режимда ишлашда давом этаётганини маълум қилди. У ерда аввалроқ хавфсизлик нуқтайи назаридан эвакуация амалга оширилган, бироқ ходимлар аллақачон иш жойларига қайтишган. Эълон қилинган видеоларда омбор устидан учиб ўтаётган дронни кўриш мумкин. Украинанинг Exilenova+ телеграм канали ёзишича, омборга ҳужум қилинган, аммо ёнғин рўй бермаган.

«Жанубий дарвоза» индустриал паркида ҳам Wildberries омбори мавжуд («Лемана Про», Alibaba Group ва бошқа компанияларники ҳам), ушбу парк ҳудудида ҳам дронлар ҳужуми оқибатида ёнғин чиққан. Расмийлар бу ерда айнан нима ёнганига аниқлик киритмаган. «Агентство» қайд этишича, Wildberries омбори комплекснинг жанубий қисмида жойлашган, ёнғин ҳам айнан шу томонда чиққан.

Ушбу парк оператори – Instone Development компаниясидир. Омбор Чехиянинг уруш бошланганидан кейин Россиядаги активларини сотишга қарор қилган PPF Real Estate компаниясига тегишли эди. 2026 йил бошида мусиқачи (скрипкачи) ҳамда Владимир Путиннинг дўсти ҳисобланган Сергей Ролдугиннинг «Талант и успех» фонди (фонд васийлик кенгашига РФ президентининг ўзи раҳбарлик қилади) Instone Development’нинг асосий эгасига айланган.

Москва шаҳри мэри Сергей Собянин 19 июл куни соат 20:30 дан 20 июл куни эрталабки соат 05:00 гача Москва области йўналишида украинларнинг 400 дан ортиқ дрони учиб келган. Унинг сўзларига кўра, дронларнинг аксар қисми анча узоқдалигида йўқ қилинган, 85 та дрон эса Москвага яқинлашаётганида уриб туширилган.

Украина президенти Володимир Зеленский ҳужум юзасидан изоҳ берди:

«Москва региони. Логистика объектлари ва нефт базасига узоқ масофали санкцияларимизнинг натижалари бор. Пилотсиз тизимлар кучлари, разведка, ракета қўшинлари ва артиллерия, махсус операциялар кучлари жангчиларига раҳмат. Чегарамиздан нишонларгача бўлган масофа 400 километрдан ортиқ.

Шунингдек, Қора денгиз акваториясида яширин флотнинг иккита танкери ва тўртта юк кемаси нишонга олинди. Россиянинг шаҳарларимиз ва областларимизга берган ҳар бир зарбасига муносиб жавоб берамиз. Бу урушни якунлаш керак ва бу фақат ушбу урушнинг ягона сабабчиси – Россияга босимни кучайтириш орқали амалга оширилиши мумкин».

Бу украин дронлари сўнгги уч кун ичида Москва областига уюштирган иккинчи ҳужум бўлди. Бундан олдингиси 18 июлга ўтар кечаси амалга оширилганди. Ўшанда Wildberries’нинг Электростал шаҳридаги омбори зарба остида қолганди – бу ушбу маркетплейснинг мамлакатдаги энг йирик логистика маркази эди.