Трампнинг америкаликларга мурожаати
Пайшанба куни кечки пайт америкаликларга мурожаат қилган президент Доналд Трамп Хитой АҚШдаги сайловларга аралашганини даъво қилди.
Энг кўп томошабинбоп вақтда эфирга узатилган нутқ – Трамп ва республикачилар учун қийин сиёсий паллага тўғри келди. Чунки унинг рейтингига Эрондаги уруш ва энергия нархларининг юқорилиги салбий таъсир кўрсатмоқда. Трамп нутқининг бошида уруш ҳақида қисқача тўхталиб, АҚШ «катта ғалабага эришаётганини» айтди.
Трамп Хитой ноқонуний равишда АҚШнинг 220 миллион сайловчиси маълумотларини қўлга киритганини кўрсатувчи махфий ҳужжатларни очиқлаётганини маълум қилди. У АҚШ разведкаси Хитой фаолияти кўламига доир маълумотларни қасддан яширганини даъво қилди.
Аслида АҚШ разведкасининг 2021 йилда махфийликдан чиқарилган ҳисоботида ҳеч бир хорижий куч президентлик сайловларининг «техник жиҳати» ёки натижаларни ўзгартиришга уринганига оид аломат топилмаганди. Боз устига ушбу хулосалар ўша пайтда Трампнинг Миллий разведка директори бўлган, ҳозирда эса МРБ директори Жон Ратклифф раҳбарлигида тайёрланганди.
Манбаларга кўра, Трампнинг Хитойга оид маълумотларни ошкор қилиши жамоатчиликни чалғитиш бўлиши мумкин.
Бундан ташқари, Хитойга нисбатан кескин оҳанги – яқинда барқарорлашган муносабатларга путур етказиш хавфини туғдирмоқда. Хитой Ташқи ишлар вазирлиги ушбу нутқ юзасидан изоҳ бермади, Пекиннинг Вашингтондаги элчихонаси «Хитой ҳеч қачон АҚШ президентлик сайловларига аралашмаган ва бундан кейин ҳам аралашмайди», деди.
Аслида Трамп йиллар давомида ўзи Байденга ютқазган сайлов натижаларига шубҳа билан қараб келади. У ўша сайловлар сохталаштирилгани, почта орқали овоз бериш фирибгарликка тўлалиги, овоз бериш машиналари ишончсизлиги каби кўплаб асоссиз даъволарни ҳам илгари сурган. Аммо судлар ва овозларни қайта санаб чиқиш жараёнлари ўшанда фирибгарлик содир бўлганига оид ҳеч қандай далил топмаган.
Оқ уйнинг журналистларга босим ўтказганига жавобан бу сафар Американинг учта йирик телерадио тармоғидан иккитаси ва CNN телеканали Трампнинг нутқини ўз платформаларида трансляция қилмади.
Мянма қирғоқларида қайиқлар ағдарилиб кетди
Халқаро миграция ташкилоти ва БМТнинг Қочқинлар бўйича олий комиссарлиги маълумотларига кўра, 250 кишини олиб кетаётган биринчи қайиқ денгизга чиққанидан кўп ўтмай алоқа узилган. 280 киши бўлган яна бир қайиқ эса 8 июл куни Мянма қирғоқлари яқинида ағдарилиб кетган деб тахмин қилинмоқда.
