Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Россия Британияга таҳдид қилди
Шу ҳафтада Украина узоқ масофага учувчи Британия ракеталаридан фойдаланган ҳолда Россия нишонларига ҳужум қилди. Россия бунга жавобан Украина ичкариси ва унинг ташқарисидаги Британия ҳарбий нишонларига зарба бериш ҳақида огоҳлантирди.
Россия ташқи ишлар вазирлиги матбуот котиби Мария Захарова томонидан берилган бу огоҳлантириш аввал ҳам янграганди, бироқ бу қадар кескин риторика билан эмас.
У Британия раҳбариятига вазиятни таҳлил қилишни ва «можарони бутунлай янги босқичга кўтарадиган йўлдан дарҳол воз кечишни» таклиф қилди.
Захаровага кўра, Лондон «россиялик тинч аҳолига қарши «терроризм ҳаракатлари»да юридик жиҳатдан шерик бўлишга атиги бир қадам қолган». Унинг «терроризм»га қилган ишораси – Украина томонидан Storm Shadow ракеталаридан Донбассдаги рус нишонларига зарба бериш учун фойдаланилгани билан боғлиқ.
Британия Мудофаа вазирлиги матбуот котиби «Лондон Украина билан елкама-елка экани ва Киевга ўзини ҳимоя қилиши» учун керакли ускуналар тақдим этишга содиқ»лигини айтди.
Таҳлилчиларнинг таъкидлашича, Москванинг огоҳлантириш шиддати — душанба куни эълон қилинган Британия қароридан ғазабдалигини акс эттиради. Мазкур қарорга кўра, Киевга Storm Shadow қанотли ракеталарини ўзи ишлаб чиқаришни бошлаши учун махфий технологиялардан фойдаланишга рухсат берилган.
Захарованинг таъкидлашича, Франция ва Британия «олов билан ўйнашмоқда», бу эса олдиндан айтиб бўлмайдиган оқибатларга олиб келиши мумкин.
Непалда қурбонлар ошди
Жума тонгига келиб Непал ва Тибетдаги тошқинда тасдиқланган қурбонлар сони 470 кишига етди. Яна мингга яқин одам бедарак йўқолган, уларнинг камида 540 нафари чет элликлардир.
Reutersʼнинг ёзишича, қутқарув гуруҳлари оғир техникалардан фойдаланиб лой ва вайроналарни қазимоқда. Омон қолганларни топиш умиди сўниб бормоқда, расмийлар эса навбатдаги ҳалокатли сув тошқини хавфини камайтириш устида ишламоқда.
Маҳаллий касалхоналар жасадларни сиғдира олмагани сабабли оилалар вафот этган қариндошларини олиб кетишига рухсат бериляпти.
