Жўрабек Мирзамаҳмудов Ўзбекистон энергетика вазири лавозимидан озод қилинди. Бу ҳақда президентнинг тегишли фармони қабул қилинди.
У саломатлиги туфайли энергетика вазири лавозимидан озод этилган Алишер Султоновнинг ўрнини эгаллаб, 2022 йил сентябридан бери идорага раҳбарлик қилиб келаётганди.
Жўрабек Мирзамаҳмудов 1979 йилда Наманган вилоятида туғилган. 2001 йил АҚШдаги Алабама университетини, 2005 йил Тошкент кимё-технологиялар институтини тамомлаган.
2006-2012 йилларда «Ўзбекнефтгаз»да турли лавозимларда ишлаган, 2012-2014 йилларда иқтисодиёт вазири ўринбосари, 2014-2017 йилларда «Ўзкимёсаноат» раиси ўринбосари бўлган, 2017-2018 йилларда Вазирлар Маҳкамасида департамент мудири лавозимида ишлаган, 2018-2019 йилларда Вазирлар Маҳкамаси ҳузуридаги Атом энергетикасини ривожлантириш агентлиги бош директори, 2019 йилдан «Ўзатом» агентлиги бош директори бўлган. 2019-2020 йилларда энергетика вазири ўринбосари лавозимида фаолият кўрсатган, 2020 йил январида «Ўзкимёсаноат» АЖ бошқаруви раиси лавозимига тайинланганди.
Президентнинг тегишли фармони билан Шерзод Хўжаев энергетика вазири этиб тайинланди.
