«Дунё» ахборот агентлиги хабарига кўра, БААнинг Allied Biofuels ва DEEM Engineering компаниялари билан Тупроққалъа туманида биоёнилғи ишлаб чиқаришни йўлга қўйиш бўйича келишув имзоланган.
Умумий қиймати 6,1 млрд долларни ташкил этувчи лойиҳа тўғридан тўғри хорижий инвестициялар ҳисобидан амалга оширилади. Жўхори поясини водород аралашмаси технологияси орқали қайта ишлаш учун Хоразм вилоятида 6 минг гектар ер ажратилган.
Ишлаб чиқаришни 2030 йилнинг учинчи чорагида йўлга қўйиш режалаштирилган. Корхонада йилига 110 минг тонна авиация ёнилғиси, 300 минг тонна электроавиация ёнилғиси ва 5 минг тонна «яшил дизел» ишлаб чиқариш кўзда тутилган.
Бундан ташқари, Allied Biofuels Урганч шаҳрида қиймати 250 млн доллар бўлган беш юлдузли меҳмонхона ҳамда 160 млн долларлик, 300 ўринли замонавий клиника қуришни режалаштирмоқда.
DEEM Engineering бош директори Муҳаммад Алфаласи Ўзбекистондаги инвестиция муҳити ва «яшил иқтисодиёт»га қаратилаётган эътибор ушбу йирик лойиҳани амалга ошириш учун замин яратганини таъкидлаган.
