Замонавий қишлоқ хўжалиги техникаси ҳақида сўз борганда, John Deere дунёда энг танилган брендлардан бири деб эътироф этилади. 360 Research Reports консалтинг компаниясининг тадқиқотларига кўра, Deere & Company корпорацияси пахта териш ускуналари сегментида етакчилик қилиб, бозорнинг 29 фоизини эгаллаб турибди. Бошқача айтганда, дунёдаги ҳар учинчи комбайн америкалик ишлаб чиқарувчининг конвейеридан чиққан.
Сентябрда Ўзбекистонга John Deere CP570 комбайнларининг илк ўнта модели олиб келиниши кутилмоқда. Илк бор рулонли турдаги пахта терувчи техника импорт қилинмоқда. Харид ҳақида қарорга келишдан олдин тест синовлари ўтказилди. 2024 йили тажриба намунаси Навоий вилояти далаларида синовдан муваффақиятли ўтиб, комбайннинг Ўзбекистон иқлим шароитларига мослашувчанлигини тасдиқлади. John Deere комбайни 1 дан 15 гектаргача бўлган кичик далаларда, бурилиш зоналари ва инфратузилма тўсиқлари билан чекланган тор кириш йўлларига эга ерларда самарали ишлашини кўрсатди.
Саватли тизим рулонли тизимга қарши: вақт тежаш омили
Ўзбекистонда тарқалган машиналарда эски саватли терим тизими қўлланади. Саватнинг сиғими 2,5–3 тонна. У тўлгандан сўнг оператор пахтани ағдариш учун комбайнни тўхтатади. Бу тадбир тракторлар, тиркама аравалар ва қўшимча ишчиларни талаб қилади. Пахтани ағдариш ўртача 20 дақиқа вақтни олади, кун давомида эса оператор қарийб 10 марта тўхташга мажбур, бу эса терим тезлигини сезиларли пасайтиради.
John Deere CP570 модели узлуксиз цикл тартибида ишлайди. Унинг ишчи тезлиги – 7,4 км/с гача, унумдорлиги – соатига 2,26 гектар. Териш ускуналари пахтани ўсимликдан механик тарзда ажратиб олади ва тўплагичга ташлайди, у ердан пахта юмалоқ тойларни ясайдиган ускунага келиб тушади. Белгиланган ўлчамга етгандан сўнг рулон ҳимоя плёнкаси билан ўралиб, далага ташлаб кетилади. Барча ишлар техникани тўхтатмасдан амалга оширилади.
Рулонли комбайнлар ҳосил теримини янада тезлаштиради. Йиғим-терим мавсуми бир ой давом этадиган Ўзбекистон учун вақт омили муҳим. Октябрь мақбул давр, чунки ноябрда ёғин-сочин бошланиб, хомашёнинг навдорлиги ва нархи пасаяди. John Deere CP570 машинасининг юқори унумдорлиги пахтанинг ёмғирлардан бузилиши хавфини камайтириб, фермерларга харид нархини сақлаб қолишга имкон яратади.
