Собиқ футболчи Зинедин Зидан Франция миллий жамоасининг янги бош мураббийи этиб тайинланди. Франция футбол федерацияси ушбу мутахассис билан тўрт йиллик шартнома имзолаган.
Зиданга миллий жамоада аввал ҳам ўзи билан бирга ишлган Давид Беттони ва Ҳамиду Мсаиди ёрдам беради. Мураббийлар штабидан, шунингдек, жисмоний тайёргарлик бўйича мураббий Грегори Дюпон ва собиқ футболчилар Фабен Бартез ҳамда Бернар Диомед ҳам ўрин олиши кутилмоқда.
Зидан бу лавозимда Диде Дешамни алмаштирди. Дешам Франция термасини 2012 йилдан буён бошқариб келаётганди. Унинг бошчилигида французлар 2018 йилги жаҳон чемпионатида ғолиб чиқди, бундан ташқари, 2016 йилги Европа чемпионати ва 2022 йилги жаҳон чемпионатида иккинчи ўринни эгаллади. 2026 йилги жаҳон чемпионатида эса французлар яримфиналда Испанияга ютқазди, учинчи ўрин учун баҳсни Англия миллий жамоасига бой берди.
Зинедин Зидан – футбол тарихидаги буюк футболчилардан бири, Франция миллий жамоаси сафида жами 108 та ўйин ўтказиб, жаҳон (1998) ва Европа (2000) чемпиони бўлган, «Олтин тўп» соҳиби.
Фаолияти давомида «Канн», «Бордо», «Ювентус» ва «Реал» каби клубларда тўп сурган.
2006 йилги жаҳон чемпионати финалида Италияга қарши ўйин вақтида Марко Матерацци билан боғлиқ воқеадан кейин, футболчилик фаолиятини якунлаган.
У мураббийлик фаолиятини 2012 йилда «Реал» академиясида бошлаган. 2016 йилда эса Рафаэл Бенитес ўрнига «Реал» бош мураббийи этиб тайинланган. Унинг бошқарувидаги икки ярим йил мобайнида мадридликлар клуби қаторасига уч марта Чемпионлар лигасида ғолиб чиққан. Зидан бундай натижага эришган ягона мураббийдир. Бу вақт оралиғида «Реал» бир марта Испания чемпиони, бир марта мамлакат Суперкубоги, икки марта УЕФА Суперкубоги соҳиби бўлган. 2019 йил мартида Зидан «Реал» бош мураббийлигига қайтади ва 2021 йил майига қадар ушбу лавозимда қолади. Шундан буён у ҳеч қаерда ишламаётган ва Франция миллий жамоаси таклифини кутаётганди.
