«Хавфсиз ва соғлом юрт» тезкор-профилактик тадбирлари доирасида Давлат хавфсизлик хизмати ходимлари «Тошкент-Аэро» ихтисослаштирилган божхона комплекси билан ҳамкорликда хориждан олиб келинган йирик миқдордаги синтетик наркотик модданинг мамлакатга олиб кирилишига чек қўйди.
Маълум қилинишича, «Бангкок–Шаржа–Тошкент» авиақатнови орқали келган 1994 йилда туғилган Қозоғистон фуқаросининг қўл юклари текширилганда, 8 дона турли хил ширинликлар қадоғи ва 5 дона пластмасса идиш ичига яширилган жами 4,4 килограмм «мефедрон» синтетик наркотик моддаси аниқланган.
Шундан сўнг ўтказилган тезкор тадбир давомида интернет орқали фаолият юритувчи наркодўкон бошқарувчисининг топшириғи билан ушбу гиёҳвандлик воситасини пойтахтдаги меҳмонхоналардан бирида қабул қилиб олган Янгийўл шаҳрида яшовчи, 2006 йилда туғилган шахс ҳам ушланди.
Текширув жараёнида маҳаллий фуқаро ёнидан пневматик пистолет ҳам топилиб, белгиланган тартибда расмийлаштириб олинди.
Ҳозирда мазкур шахсларга нисбатан Жиноят кодексининг 246-моддаси 2-қисми билан жиноят иши қўзғатилиб, уларга нисбатан «қамоқ» эҳтиёт чораси қўлланди. Айни пайтда тергов ҳаракатлари давом этмоқда.
