Доналд Трамп бу ҳақда Truth Social ижтимоий тармоғидаги саҳифасида хабар қилди. Унинг ёзишича, «Тинчлик кенгаши» ҲАМАС ҳамда Ғазо секторидаги бошқа барча қуролли гуруҳларни тўлиқ қуролсизлантириш бўйича келишувга эришган.
«Бугун Тинчлик кенгаши ҲАМАС ва Ғазо секторидаги бошқа барча қуролли гуруҳларни тўлиқ қуролсизлантириш бўйича тарихий келишувга эришди. Бу барқарор тинчлик ва хавфсизлик сари улкан қадамдир», — деб ёзди АҚШ президенти.
Трамп музокараларда воситачилик қилган Миср, Қатар ва Туркияга миннатдорлик билдирди. Унинг таъкидлашича, ҲАМАС ва унга иттифоқчи гуруҳларни қуролсизлантириш жараёни босқичма-босқич амалга оширилади.
AFP агентлигининг хабар беришича, ҲАМАСнинг юқори мартабали вакиллари АҚШ билан бундай келишувга эришилганини тасдиқлаган. Шу билан бирга, Исроил ҳукумати ҳозирча бу борада расмий изоҳ бермаган.
Нашрнинг қайд этишича, Ғазодаги можарони тўхтатиш бўйича АҚШ режасининг иккинчи босқичини амалга ошириш юзасидан музокаралар бир неча ҳафтадан буён Мисрда давом этмоқда. Ушбу босқич нафақат ҲАМАСни қуролсизлантиришни, балки Исроил армиясини Ғазо секторидан босқичма-босқич олиб чиқишни ҳам назарда тутади.
Жанглар тўхтатилганидан сўнг ҳудуд бошқарувини АҚШ томонидан ташкил этилган «Тинчлик кенгаши» ҳузуридаги фаластинлик технократлар қўмитаси ўз зиммасига олиши режалаштирилган.
Аввалроқ Исроил ҲАМАСни тўлиқ қуролсизлантиришни можарони юмшатиш ва кейинги келишувлар учун асосий шарт сифатида кўрсатган эди.
2023 йил 7 октябрда ҲАМАС Исроилга кенг кўламли ҳужум уюштирган. Ҳужум оқибатида тахминан 1200 киши ҳалок бўлган, қарийб 250 нафар одам гаровга олиб кетилган. Бунга жавобан Исроил Ғазо секторида ҳарбий операция бошлаган. Ғазо соғлиқни сақлаш вазирлиги маълумотига кўра, шундан буён 71 мингдан ортиқ одам ҳалок бўлган.
