28 июл куни Саудия Арабистони ўзининг ҳаво ҳужумидан мудофаа тизимлари қиролликдаги нефть объектларини нишонга олган ўнлаб дронларни йўқ қилганини маълум қилганди. Саудия Арабистони Мудофаа вазирлиги ҳужумларни «Эрон томонидан қўллаб-қувватланувчи жангарилар Ироқ ҳудудидан амалга оширган», деб баёнот берди.
Куннинг иккинчи ярмида АҚШ Марказий қўмондонлиги ва Саудия қирувчи самолётлари билан бир нечта қурол-яроғ омборлари ва логистика объектларига юқори аниқликдаги зарбалар берганини маълум қилди.
Саудия Арабистони Мудофаа вазирлигига кўра, ҳужум қилинган объект Ироқ шарқида жойлашган бўлиб, Эрон томонидан дрон ҳужумларини бошқариш учун фойдаланилган.
АҚШ ҳарбийлари Эрондаги Муҳофизлар корпусини АҚШ қўшинлари ва Саудия энергетика инфратузилмасига қилинган ҳужумларни бошқарганликда айблади.
Аввалроқ Centcom АҚШ кучларига қарата учирилган бир нечта баллистик ракеталарни ўз ичига олган Эроннинг «кутилмаган ҳужум»ини барбод қилганини айтганди. АҚШ нашрларига кўра, ракеталар Иорданиядаги АҚШ ҳарбий базаси томон йўналтирилган бўлган.
Ироқда қурбонлар бор. Эрон Иорданияга ҳужум қилди
Ироқнинг Халқ сафарбарлик кучлари АҚШ ва Саудия Арабистони уларнинг Басрадаги бош қароргоҳига зарба берганини тасдиқлади.
Anadolu нашрининг гуруҳга таяниб ёзишича, ҳужумларда камида 20 киши ҳалок бўлган ва яна 32 жароҳатланган. Бундан ташқари, Халқ сафарбарлик кучларининг бир қатор бино-иншоотларига зарар етган.
Аммо, Эрон мудофаа тизими расмийси бошқа давлатлардан Саудия объектлари томон отилган снарядларга уларнинг алоқаси борлигини қатъиян инкор этди.
Эрон ҳарбийлари ҳам чоршанба куни эрталаб Иорданиядаги АҚШ авиабазаси ва Марказий қўмондонлик маркази томон бир нечта баллистик ракеталар учирган.
Иордания ҳарбийларининг ҳужумларни тасдиқлади. Маълум қилинишича, чоршанба куни подшоҳлик ҳаво ҳужумидан мудофаа тизимлари Эроннинг бешта ракетасини тутиб қолган ва уриб туширган.
Шунингдек, Эрон Ислом инқилоби муҳофизлари корпуси чоршанба куни ўз кучлари бўғоздаги учта нефть танкерига зарба берганини билдирди. Корпусга кўра, «хавфли ҳамда ноқонуний йўналиш» бўйича ҳаракатланаётган кемалар огоҳлантиришларни эътиборсиз қолдиргач мажбуран тўхтатилган.
Муҳофизлар корпуси ўз баёнотида стратегик сув йўли устидан тўлиқ назоратни сақлаб қолишда давом этаётганини маълум қилди. Шунингдек, «АҚШнинг ноқонуний ҳарбий аралашуви» ҳамда минтақадаги кемаларга бериладиган кўрсатмалари жавобсиз қолмаслиги ҳақида огоҳлантирди.
Кўрфаз бўйича Уммоннинг таклифи рад қилинди
Чоршанба куни Теҳрон Уммоннинг Ҳўрмуз бўғозини минтақавий биргаликда бошқариш ҳақидаги таклифини рад этди. Бу сўнгги ойларда Кўрфаз савдосини бўғиб қўйган боши берк кўчадан чиқиш умидларини чиппакка чиқарди.
Уммон ушбу муҳим бўғоз атрофидаги зиддиятни ҳал этишга қаратилган янги минтақавий келишувни таклиф қилган эди. Бироқ, Теҳрон ушбу таклифнинг муваффақиятга эришиш имкони йўқлигини айтган.
Reuters манбаларига кўра, Уммон Кўрфаз давлатлари томонидан қўллаб-қувватланган ва сув йўлидан ўтаётган кемалардан ихтиёрий йиғимлар ундиришни ўз ичига оладиган режани тақдим этган. Таклифга кўра, Эрон якка ўзи назоратни амалга оширмаслиги ва йиғимлар ихтиёрий бўлиши керак эди, дейди манба.
Эрон етакчилари эса АҚШ ва Саудия Арабистони стратегик бўғозга оид ўзларининг «нореал режаларини» илгари суриш учун Уммонга босим ўтказишга уринмоқда, деб ҳисоблайди. Шу боис, Эрон бўғоз орқали ўтадиган барча кириш йўналишлари ва чиқиш йўналишининг бир қисми Эрон назорати остида бўлиши кераклигини таъкидлаган.
«Теҳрон Уммонни қадрли қўшни деб ҳисобласа-да, улар билан 50 га 50 нисбатдаги қўшма назорат келишуви Эрон манфаатларига хизмат қилмайди», деган Эрон расмий.
Ҳужумлар яна кучайгани сабабли чоршанба куни нефть нархи бир баррели учун 3 доллардан кўпроққа қимматлашди.
Бундан ташқари, сўнгги кунлардаги ўзаро ҳужумлар жанговар ҳаракатлардаги қисқа танаффусга барҳам берди. Бу танаффус АҚШ президенти Доналд Трамп икки ҳафталик бомбардимон кампаниясини тўсатдан бекор қилгани ва Эрон ҳам худди шундай йўл тутгандек кўринганидан сўнг юзага келган эди.
