Ушбу хабар дастлаб мудофаа соҳасига ихтисослашган Defence Security Asia порталида пайдо бўлди. Нашрнинг даъво қилишича, "2025 йил 2 июлда дастлабки иккита J-10CE самолёти Тошкентга етиб келгани факт".
Манбада айтилишича, Ўзбекистон мудофаа вазири, генерал-лейтенант Шуҳрат Холмуҳаммедов «жами 24 та самолётга шартнома тузилгани, етказиб бериш босқичма-босқич амалга оширилиши ва ўзбек учувчилари Хитойда қайта тайёргарликдан ўтаётгани» ҳақида маълум қилган.
Бироқ мутахассислар мамлакатдаги ҳарбий самолёт сони ҳали жанговар қудрат эмаслигини эслатмоқда. Учувчиларнинг тайёргарлиги, техник хизмат инфратузилмаси, эҳтиёт қисмлар ва етарлича ўқ-дорилар захираси бўлмаса, энг замонавий техника ҳам шунчаки рақам бўлиб қолади.
«Жанговар реклама» омили
J-10CE экспорт бозорида – 2025 йил май ойида Ҳиндистон–Покистон ўртасидаги ҳаво тўқнашувларидан кейин кескин оммалашди. Ўшанда Покистон бу самолётлар ёрдамида Ҳиндистоннинг Rafale ва Су-30МКИ қирувчиларини уриб туширганини даъво қилганди.
Бу маълумотлар мустақил тасдиқланмаган ва мунозарали бўлиб қолмоқда, бироқ Хитой оммавий ахборот воситалари уларни кучли маркетинг воситасига айлантирди.
Нега Марказий Осиёда давлатлари Россияга юзланмаяпти?
Бу ерда «айб» Москванинг ўзида. Украинадаги уруш эҳтиёжларига йўналтирилган Россия мудофаа саноатини – 2022 йилдан бери кучайган санкциялар «синдирмоқда». Яъни, энг муҳим деталлар: электроника ва аниқ ишлов бериш ускуналари таъминоти чеклаб қўйилди. Натижада Марказий Осиё ва Ўзбекистон каби анъанавий харидорлар, ҳатто оддий эҳтиёт қисмлар учун ҳам узоқ навбатларга дуч келмоқда.
