Маълум қилинишича, ушбу шахс Ўзбекистон Жиноят кодексининг 244-2-моддаси биринчи қисмида назарда тутилган жиноятни содир этганликда айбланмоқда. Жиноят иши қўзғатилганидан сўнг у мамлакат ҳудудини тарк этиб, узоқ вақт хорижда яширингани сабабли Интерпол каналлари орқали халқаро қидирувга берилган.
Интерполнинг Тошкент ва Варшава Миллий марказий бюролари мувофиқлаштирилган ҳаракатлари ҳамда Ўзбекистоннинг Полшадаги элчихонаси вакили иштирокида қидирувдаги шахснинг турган жойи аниқланди. Шундан сўнг халқаро ҳамкорлик ва экстрадиция тартиб-таомиллари доирасида у Интерполнинг Ўзбекистондаги Миллий марказий бюроси ходимларига топширилди.
Қайд этилишича, мазкур экстрадиция икки давлат ваколатли органлари ўртасидаги самарали ҳамкорлик ҳамда халқаро полиция тизимининг жиноий таъқибдан яшириниб юрган шахсларни аниқлаш ва жавобгарликка тортиш борасидаги самарадорлигини яна бир бор намоён этди.
Интерполнинг Ўзбекистондаги Миллий марказий бюроси мамлакат ташқарисига чиқиб кетиш қидирувдаги шахсларга жиноий жавобгарликдан қочиш имконини бермаслигини, халқаро полиция ҳамкорлиги орқали уларни аниқлаш, ушлаш ва Ўзбекистонга қайтариш бўйича зарур чоралар изчил амалга оширилишини таъкидлади.
