Россия Киев областидаги маркетплейслар ва логистик марказларни ўққа тутди

Россиялик ҳарбийлар 5 августга ўтар кечаси ракеталар ва дронлар билан Украина бўйлаб ёпирилма зарба йўллади. Ҳужумнинг асосий йўналиши Киев области бўлди, деб хабар қилди Украина қуролли кучлари ҳаво кучлари қўмондонлиги. Киев ҳам зарбага учраган.

Украина қуролли кучларига кўра, РФ қўшини Украина бўйлаб «Циркон»/«Оникс» русумли кемаларга қарши ракеталардан тўртта, «Искандер-М» русумли 24 та баллистик ракета, шунингдек, турли типдаги 115 та дрон учирган.

Ҳужум оқибатида 17 киши ҳалок бўлиб, 44 киши яраланди, деб хабар берди Украина президенти Володимир Зеленский. «Баллистика тутувчилар бугун ҳалок бўлганларнинг ҳаётини сақлаб қолиши мумкин эди. Ҳамкорлар бундай ракеталар билан таъминлашдаги кечикишлар ёки баллистикага қарши воситаларни топширишга тайёр эмаслик айнан шундай даҳшатли қурбонлар ва вайронагарчиликларга олиб келишини тушунишлари жуда муҳим», – дея қўшимча қилган у.

Россия ракеталари ва дронларини тўхтатиш учун авиация, зенит ракета қўшинлари, радиоэлектрон кураш ва пилотсиз тизимлар бўлинмалари, шунингдек, мобил ўт очиш гуруҳлари жалб этилган. Аммо Украина қуролли кучлари ҳаво кучлари ҳисоботидан билиш мумкинки, улар бирорта ракетани уриб тушира олишмаган.

Ҳаво кучлари қўмондонлиги ҳисоботида фақат ҳаво ҳужумидан мудофаа кучлари россияликларнинг 98 та дронини ишдан чиқаргани ҳақида гап кетади. «26 та локацияда ракеталар ва 17 та зарбдор дрон зарбаси қайд этилган, шунингдек, олтита локацияга уриб туширилган объектлар парчалари қулаган», – дейилади ҳисоботда. Одатда идора баёнотида, агар Россия ракеталари уриб туширилган бўлса, бу ҳақда албатта алоҳида тилга олинган.

Зеленский иттифоқчилардан мунтазам равишда Украина ҳаво ҳужумидан мудофаа кучлари учун ракеталар етказиб беришни сўраб келади. 1 август куниёқ у Украинада Patriot қурилмалари учун тутиб қолувчи ракеталар қолмаганини айтганди. Бундай ракеталар ва комплекслар Украина ҳаво ҳужумидан мудофаа кучлари учун ўта муҳим ҳисобланади. Киевдагилар Россиянинг доимий зарбалари шароитида Patriot учун снарядлар етишмовчилигидан шикоят қилиб келган ва агар ракеталар муаммоси қишга қадар ҳал қилинмайдиган бўлса, Россия энергетика инфратузилмаси бўйлаб зарбаларни сезиларли даражада кучайтириши мумкинлигидан хавотир билдирган.

Июл ойида Оқ уйдаги учрашувда ҳам Володимир Зеленский Доналд Трампдан қишгача Patriot учун ракеталарнинг шошилинч пакетини тақдим этишни сўраганди. The Atlantic маълумотига кўра, Америка президенти рад жавобини берган. АҚШнинг ўзи ҳам Эрон билан давом этаётган уруш фонида ракеталар тақчиллигини бошдан кечирмоқда. Трамп Киевга Patriot учун ракеталар ишлаб чиқаришга лицензия берилишини айтганди. Аммо кейин бу ваъдасидан тонди.

Зеленскийнинг сўзларига кўра, тунги ҳужумларнинг асосий нишонлари «урушга алоқаси йўқ объектлар» бўлган: пиво тайёрланадиган корхона, қурилиш материаллари омборлари, фуқаролик логистикаси, шунингдек, темирйўл станцияси. Киев шаҳри ва Киев областида, маҳаллий расмийларга кўра, йирик ёнғинлар рўй берган. Пойтахтнинг Голосеевский районида резервуар шикастланиши оқибатида аммиак сизиб чиқиши рўй берган.

Киев шаҳри ва областда зарбалар оқибатида «Новая почта»нинг саралаш маркази, Украинадаги энг йирик маркетплейс ҳисобланган Rozetka омбори, «Эпицентр» савдо марказининг логистик нуқталари йўқ қилинган. Rozetka’нинг Бровари районидаги омбори сўнгги кунларда учинчи марта зарба остида қолмоқда.

Бу зарбалар украин дронларининг Россиядаги энг йирик Wildberries маркетплейси омборларига ҳужумларига параллел тарзда кечмоқда. Июл ойининг иккинчи ярмидан буён украин ҳарбийлари ушбу компаниянинг камида 21 та объектига зарба берган. Хусусан, 5 август куни ҳужум оқибатида Тула областидаги омбор ёниб кетди.

Россия мудофаа вазирлиги Россия ҳарбийлари Киев шаҳри ва Киев областидаги транспорт-логистика ва тарқатиш марказларига зарба берганини маълум қилди. Вазирлик ушбу марказлар турли қурол-яроғлар, ҳарбий ва икки мақсадли юкларни сақлаш ва етказиб бериш, шунингдек, дронлар ва уларнинг бутловчи қисмларини ишлаб чиқариш ва тақсимлаш билан шуғулланишини таъкидлаган. Киевдагилар ҳам Wildberries омборларига берилган зарбаларни оқлаш учун шунга ўхшаш сабабни келтирган.

«Украинская правда» нашри ёзишича, Украинанинг Wildberries бўйлаб ҳужумлари ва РФ ҳарбийларининг украин компанияларининг логистик марказлари бўйлаб зарбаларини «симметрик» ёки «жавоб» зарбалари деб бўлмайди. Нашр қайд этишича, Россия украин компанияларининг омборларига урушнинг бошидан буён зарба бериб келади, Wildberries бўйлаб ҳужумлар бошланганидан кейин Украинадаги логистик марказлар бўйлаб интенсив зарбалар ўсгани қайд этилмаган.