SpaceX компаниясига тегишли Falcon 9 ракета-ташувчисининг ишлатиб бўлинган юқори босқичи кутилганидек Ойга тушди. Ҳодиса 5 август куни Европа Жанубий обсерваторияси (ESO) томонидан Чилида жойлашган Very Large Telescope (VLT) телескопи орқали қайд этилди. Мутахассислар спектрал таҳлил орқали тўқнашув содир бўлганини тасдиқлади.
Бундан аввал АҚШнинг Миллий аэронавтика ва космик фазони тадқиқ қилиш бошқармаси (NASA) зарба берилган ҳудудни суратга олишини маълум қилган эди. Бироқ тасвирларни Ерга узатиш бир неча кун давом этиши мумкин.
NASA ҳисоб-китобларига кўра, ракета бўлагининг Ойга урилиши натижасида диаметри тахминан 18 метр, чуқурлиги эса қарийб 4 метр бўлган кратер ҳосил бўлиши кутилмоқда. Зарба Ойнинг Эйнштейн ва Белл кратерлари яқинида содир бўлгани тахмин қилинмоқда.
Маълум қилинишича, Falcon 9 ракета-ташувчиси 2025 йил 15 январда учирилиб, Blue Ghost 1 қўниш модулини муваффақиятли равишда Ойга йўналтирган. Ракетанинг биринчи босқичи Ерга қайтган бўлса, юқори босқичи очиқ космосда қолиб кетган.
SpaceX вакили Жулианна Шайманнинг тушунтиришича, Қуёш фаоллиги ҳамда гравитация таъсирининг биргаликдаги омиллари сабабли ракета бўлаги ҳисобланган траекториядан оғиб кетган ва режалаштирилмаган ҳолда Ой томон ҳаракатланган.
Мутахассисларнинг таъкидлашича, мазкур ҳодиса Ер аҳолиси учун ҳеч қандай хавф туғдирмаган. Бироқ у космик чиқиндилар билан боғлиқ муаммони яна бир бор кун тартибига олиб чиқди.
Европа космик агентлиги (ESA) маълумотларига кўра, ҳозирда Ер атрофи орбитасида 46 мингдан ортиқ космик чиқинди объекти мавжуд бўлиб, уларнинг умумий оғирлиги тахминан 17 минг тоннани ташкил этади.
