Хусусий компания томонидан ишлаб чиқилган Хитойнинг Kinetica-2 Y2 ташувчи ракетаси 18 та сунъий йўлдошни белгиланган орбиталарга муваффақиятли олиб чиқди. Учириш миллий паст орбитали сунъий йўлдош интернет тизимларини кенг миқёсда жойлаштиришга хусусий аэрокосмик корхоналарни жалб этишда муҳим босқич бўлди.
Ракетани ишлаб чиққан CAS Space компанияси хабар беришича, учириш 3 ноябр куни Хитойнинг шимоли-ғарбидаги Дунфэн тижорий космик инновациялар тажриба ҳудудидан амалга оширилган. Ракета Хитойнинг «Цянфан» (Qianfan) сунъий йўлдош интернети лойиҳаси доирасида қутбий орбиталарда жойлаштирилаётган сунъий йўлдошларнинг навбатдаги, 21-партиясини орбитага етказди.
Бу Kinetica-2 ракетасининг иккинчи парвози ҳамда йирик интернет тармоғи учун кўп сонли сунъий йўлдошларни орбитага олиб чиқиш бўйича биринчи миссияси бўлди. Учириш Хитой хусусий тижорий космик секторининг миллий космик инфратузилма лойиҳаларини амалга оширишдаги имкониятлари ортиб бораётганини кўрсатди.
Kinetica-2 ракетасини яратиш дастури раҳбари ва бош конструктори Ян Хаолян Хитойнинг паст орбитали сунъий йўлдош интернети дастури аппаратларни жадал жойлаштиришнинг муҳим босқичига кирганини билдирди. Сунъий йўлдош тизимларини барпо этиш суръати тезлашгани сайин мамлакатнинг космик аппаратларни учириш хизматларига эҳтиёжи сезиларли даражада ортиб бормоқда.
CAS Space компанияси ишлаб чиққан Kinetica-2 ракетаси 500 километр баландликдаги Қуёш-синхрон орбитага 8 тоннагача, 200 километр баландликдаги паст Ер орбитасига эса 12 тоннагача фойдали юк олиб чиқа олади. Бундай кўрсаткичлар ракетадан кўплаб сунъий йўлдошларни орбитага жойлаштириш ва юкларни коинотга кам харажат билан етказиш учун фойдаланиш имконини беради.
Шанҳай ҳукуматининг расмий сайтида эълон қилинган хабарга кўра, Хитойнинг «Цянфан» сунъий йўлдош интернети тармоғидаги паст орбитали кенг полосали алоқа сунъий йўлдошлари сони 256 тага етган. 2026 йил охиригача яна 68 та аппаратни учириб, уларнинг умумий сонини 324 тага етказиш режалаштирилган. Бу тизимдан тижорий фойдаланишни бошлаш учун замин яратиши керак.
